Muher di 27 aña asesina den cura di su cas na Pos Chikito

POS CHIKITO — Diviene Celine Lillian Vlaun, di 27 aña, a wordo asesina diasabra madruga den cura di su cas na Pos Chikito. Segun informacion preliminar di polis, e tironan lo a bin for di un auto  color scur cu a pasa dilanti e cas.

Central di Polis a ricibi e aviso pa mas o menos 3:10 di madruga y a despacha polis y ambulance. Na yegada, e prome patruya a encontra Vlaun den cura, cu no tabata reacciona.

Personal di ambulance no por a haci nada mas pa salba su bida. Un dokter forensico a constata morto di e victima, kende a nace na Aruba dia 12 di mei 1999.

Segun e prome informacion, un of mas bala a alcansa Vlaun mientras e tabata den cura di su cas. Diferente unidad di polis a busca den e bisindario pa trata di localisa e auto.

Recherche y Polis Forensico a presenta na e sitio pa haci investigacion. E informacion comparti ainda no ta indica un motibo ni identidad di e persona of personanan responsable.

Departamento di Slachtofferhulp a brinda sosten na famia di e victima. Cuerpo Policial Aruba a expresa condolencia na su famia y ta pidi cualkier persona cu a mira algo of tin informacion pa yama e tiplijn 11141. Informantenan por keda anonimo.