Ireno Quant ta bira e di 13 morto den trafico na Aruba

SAVANETA — Ireno Quant, di 70 aña, a fayece despues di un presunto accidente di hit-and-run diasabra marduga riba caminda di Savaneta, na altura di Winter Garden Supermarket. E ta e di 13 morto den trafico na Aruba pa 2026.

Pa mas o menos 5:03 di marduga, polis a ricibi aviso cu posiblemente un auto a dal un peaton y a bandona e sitio. Na yegada, e patruya a haya e persona Quant band’i caminda, sin reaccion.

Paramediconan a detecta pulso y a transport’e cu maximo urgencia pa hospital. Na yegada, sinembargo, un dokter a constata su morto.

Un rato despues, polis a ricibi aviso cu e chauffeur envolvi a presenta na Warda di Polis di San Nicolas. Specialistanan di trafico y polis tecnico ta investiga e circunstancianan di e accidente. Slachtofferhulp tambe a wordo notifica.

Cuerpo Policial Aruba a expresa condolencia na famia di Quant y a haci un yamada na comunidad pa conduci cu precaucion.