Notanan priva di Beatrix ta revela critica riba politica di Aruba, Corsou y Hulanda

ORANJESTAD — Notanan personal di ex-reina Beatrix ta mustra cu e tabatin opinionnan fuerte tocante politica di Aruba y Corsou, pero tambe tocante e manera cu Hulanda tabata trata e islanan Caribense den Reino.

E notanan ta forma parti di un investigacion nobo riba historia colonial di Cas Oranje-Nassau, dirigi pa historiador Gert Oostindie y entrega na rey Willem-Alexander. E rey a encarga e investigacion na 2022.

Beatrix tabata preocupa tocante e lucha pa Status Aparte di Aruba y e strategia politico di Betico Croes. Su notanan posterior riba Corsou ta contene observacionnan directo tocante gobernacion, corrupcion y relacion cu Hulanda. Tambe e tabatin critica fuerte riba Hulanda mes.

Segun e investigacion, Beatrix a interveni tras di cortina den decisionnan politico hulandes. Su notanan no tabata maneho oficial di Gobierno, pero ta revela su opinionnan personal y e temanan cu e tabata trece dilanti di ministronan.