Polis ta investiga posible tiramento riba chauffeur di brommer na Seroe Biento

ORANJESTAD — Cuerpo Policial Aruba (KPA) ta investigando un caso serio di posible tiramento riba un chauffeur di brommer cu tabata pasando riba e caminda di Seroe Biento diaranson anochi.

Segun polis, e homber a sinti un dolor na su lomba durante su trayecto. Ora el a yega cas, el a descubri un bala pega den su soporte di lomba (rugbrace). El a informa Central di Polis inmediatamente, cu a manda un patruya, recherche y polis forensico pa investiga.

Departamento di Recherche ta na altura di algun caso relaciona cu tiramento den e area di Seroe Biento y ta investiga nan rigurosamente. KPA no ta descarta cu detencionnan por sigui den e proximo dianan.

Polis ta pidi cualkier persona cu tin informacion of cu a mira algo sospechoso pa yama e tiplijn 11141. Informacion por wordo comparti anonimamente.