Polis ta lansa campaña nacional contra maneho bao influencia: “Busca bo amigo responsabel”

ORANJESTAD — Cuerpo Policial Aruba ta inicia un campaña nacional nobo pa sigui crea conciencia tocante e peligronan di maneho bao influencia di alcohol y otro sustancianan. E mensahe central di e campaña ta simpel: “Busca bo amigo responsabel.”      

Polis ta exhorta personanan cu ta bai bebe pa designa un chauffeur cu no a consumi alcohol of otro substancia y cu por maneha e vehiculo pa yega na su destino sigur. Segun KPA, maneho bao influencia por tin consecuencia fatal, no solamente pa e chauffeur, sino tambe pa personanan inocente den trafico.      

KPA ta indica cu controlnan den trafico ta continua y cu, cu fin di aña acercando, e controlnan lo bira ainda mas intensivo. Polis ta pidi comunidad pa actua cu responsabilidad y preveni situacionnan cu por termina den tragedia.