Organisacionnan ta menaza demanda pa para benta di ‘bril sabi’ di Meta

AMSTERDAM — Varios organisacion na Hulanda ta exigi cu Meta para benta di su bril inteligente  (sabi) cu camera. Si e empresa no haci esaki den dos siman, nan ta anuncia cu nan lo inicia un demanda hudicial.

E exigencia ta bin di Consumentenbond, organisacion di asistencia Offlimits y grupo di accion The Firewall, cu ta critica poder di Big Tech.

Offlimits, cu ta duna sosten na victima di abuso online, ta bisa cu nan a ricibi caba prome relatonan di personanan cu a sinti nan incomodo of cu a wordo filma sin nan sa riba caya cu e tipo di brilnan aki. Segun e organisacion, esaki ta motibo suficiente pa para benta.

E brilnan cu camera a bira tema di discusion publico, specialmente pasobra nan ta bira cada biaha mas similar na bril normal, haciendo dificil pa hende nota cu nan por ta wordo filma.

Autoriteit Persoonsgegevens a adverti recientemente cu foto y video capta cu e brilnan no por simplemente wordo publica sin tene cuenta cu reglanan di privacidad.

Brilnan di Meta, incluyendo modelonan desarrolla cu Ray-Ban y Oakley, ta entre esnan mas popular actualmente. Otro companianan grandi manera Samsung, Google y Apple tambe ta trahando riba tecnologia similar.