Homber deteni na Aruba pa supuesto contrabanda di hende cu morto como consecuencia

ORANJESTAD — Unit Mensenhandel en Mensenmokkel (UMM) di Cuerpo Policial Aruba a detene un homber Venezolano di 51 aña relaciona cu un caso di supuesto contrabanda di hende for di Venezuela pa Aruba.

Segun Polis, e sospechoso lo tabata involucra den transporte di personanan den un boto durante anochi di 4 pa 5 di september. Dia 7 di september, restonan mortal di un di e personanan cu lo tabata abordo a wordo haya na altura di Boca Tabla/Bachelor’s Beach, patras di Anker na San Nicolas.

Durante un entrada hudicial na cas di e sospechoso na Kuiperistraat, UMM a traha hunto cu Unit Narcotica, Flex Team, Polis Uniforma y RRT. Den e apartamento a haya cinco otro persona di nacionalidad Venezolano, cu a wordo transporta pa interrogatorio.

Polis ta señala cu contrabanda di hende cu morto como consecuencia por carga un castigo maximo di 18 aña di prison.

Investigacion ta sigui activamente. Polis ta pidi cualkier persona cu tin informacion tocante e caso pa yama tipline 11141. Informacion por wordo duna anonimamente.

UMM ta forma parti di Cuerpo Policial Aruba desde 2017 y ta specialisa den investigacion di traficacion y contrabanda di hende. E unidad ta consisti di personal di Polis Aruba y Koninklijke Marechaussee.