Atraco arma na supermercado na San Nicolas: A horta 5 mil florin

SAN NICOLAS — Dos homber cara tapa, di cual un tabata arma cu un arma di candela, a comete un atraco diaranson anochi na Mei Hua Xi Supermarket na Weg Seroe Preto na San Nicolas. Segun informacion preliminar, e sospechosonan a huy cu aproximadamente 5 mil florin.

Central di Polis a wordo notifica pa mas o menos 8:10 di anochi y a despacha patruyanan di San Nicolas y otro unidadnan policial cu tabata riba caya.

Segun e prome informacion, e dos homber a drenta e supermercado cu nan cara tapa y a atraca e persona tras di cash register. Durante e atraco, un di e sospechosonan a golpia e victima cu cabo di e arma di candela.

E victima a declara cu ambos sospechoso tabata bisti hoodie y carson color scur. Nan a papia Papiamento kibra y Spaño, mientras cu un di nan tabatin un rugtas.

Despues di e atraco, e sospechosonan a huy na pia den direccion pariba cu aproximadamente 5 mil florin.

Personal di ambulance a brinda asistencia medico na e victima y posteriormente a transport'e pa ImSan pa tratamiento.

Atraco Team y Polis Tecnico a presenta na e sitio pa continua cu investigacion.

Cuerpo Policial Aruba ta haci un apelacion na tur persona cu por tin informacion of cu a mira algo relaciona cu e atraco pa yama tip line di polis na 11141. Informacion por wordo duna anonimamente.