SINT EUSTATIUS — Prome Minister Mike Eman y Minister Gerlien Croes a representa Aruba dialuna 16 di november durante e conmemoracion di 250 aña di First Salute na Sint Eustatius, un acontecimento historico relaciona cu e prome reconocemento simbolico di bandera di Merca despues di su declaracion di independencia.
E ceremonia na Fort Oranje a conta cu presencia di Rey Willem-Alexander, Secretario di Estado pa Relacionnan den Reino Eric van der Burg, Embahador Mericano Joseph V. Popolo y diferente otro dignatario.
E conmemoracion ta recorda e acontecimento di 16 di november 1776, ora e bapor militar Mericano Andrew Doria a saluda Fort Oranje cu cañon y gobernador Johannes de Graaff a ordena pa contesta e saludo. E gesto a bira conoci como First Salute y ta considera un momento simbolico importante den historia di independencia Mericano.
Durante e ceremonia, Rey Willem-Alexander a reflexiona riba e importancia historico di e acontecimento, pero tambe riba e pasado di sclavitud di Sint Eustatius y e papel di Reino Hulandes den e sistema colonial.
E programa a inclui un recreacion di e saludo historico, cu 13 tiro di cañon for di un bapor militar Mericano y 11 tiro como contesta for di tera. Tambe tabatin presentacionnan cultural y participacion di avion militar Mericano.
Otro momento importante tabata inauguracion di Museo Fort Oranje pa Rey Willem-Alexander. E museo ta presenta historia di Sint Eustatius, incluyendo comercio internacional, First Salute y su pasado colonial y di sclavitud.
Participacion di Eman y Croes a pone Aruba presente na un conmemoracion cu ta resalta e lasonan historico entre Caribe, Reino Hulandes y Estados Unidos.