Pieters: Aruba no por logra brain gain sin vivienda accesibel

Pieters: Aruba no por logra brain gain sin vivienda accesibel

Posted on 11/17/2026, 6:50 AM AST | Updated on 11/17/2026, 6:50 AM AST

ORANJESTAD — Parlamentario y lider di fraccion di Partido Patriotico di Aruba (PPA), Eduard Pieters, ta adverti cu Aruba no por aspira pa retene of atrae profesionalnan hoben si nan no tin oportunidad pa haya un vivienda accesibel y construi nan futuro riba e isla.

Durante un encuentro cu prensa, Pieters a relaciona e crisis di vivienda directamente cu e problema di brain drain, unda profesionalnan prepara ta sali of no ta regresa na Aruba debi na falta di oportunidadnan pa establece nan mes.

Segun e parlamentario, inversion den educacion y creacion di empleo no ta suficiente si hobennan no por cumpra tereno, construi cas of forma un famia. E ta considera vivienda accesibel un condicion esencial pa logra brain gain y fortalece desaroyo economico di Aruba.

Pieters a expresa su sosten na e proposicion di lider di PPA, Otmar Oduber, pa introduci un Tax Holiday riba construccion di vivienda. E iniciativa ta contempla exoneracion di impuesto di transferencia, derecho di importacion y BBO pa casnan di te 120 meter cuadra, cu un costo di construccion di referencia di te Afl. 2.800 pa meter cuadra.

Segun PPA, e medida por reduci gastonan di construccion cu aproximadamente 10%, dependiendo di e condicionnan final. E cifra aki ta un calculo di e partido y no un ahorro confirma.

Pieters ta pidi pa e proposicion wordo considera seriamente den debate politico y presupuestario, enfatizando cu vivienda accesibel no ta solamente un asunto social, sino tambe un inversion den futuro di Aruba.