ORANJESTAD — Departamento di Salud Publico (DVG) ta haci un apelacion na comunidad di Aruba pa asumi mas responsabilidad den cuido y proteccion di cacho, particularmente esnan cu ta biba riba caya den condicionnan dificil.
Segun DVG, diariamente tin cacho cu ta enfrenta hamber, sed, malesa, accidente y maltrato, sin acceso na awa, cuminda of un luga sigur pa drumi. E departamento ta enfatisa cu ningun animal a scohe pa biba den e circunstancianan aki y cu nan ta depende di hende pa nan bienestar.
DVG ta subraya cu pone fin na sufrimento di cacho no ta solamente un cuestion di compasion, sino tambe di responsabilidad colectivo. E ta haci un yamada pa evita abandono di animal, promove adopcion responsabel y sterilisacion, y ofrece cuido adecuado.
Tambe e departamento ta anima ciudadanonan pa apoya iniciativanan di bienestar animal y no keda indiferente ora nan mira un cacho den necesidad.
Segun DVG, un Aruba cu menos cacho sufriendo riba caya ta cuminsa cu e decisionnan y accionnan di cada ciudadano.