Periodista cu tabata investiga narcotrafico, asesina na Costa Rica

Periodista cu tabata investiga narcotrafico, asesina na Costa Rica

Posted on 11/17/2026, 6:33 AM AST | Updated on 11/17/2026, 6:33 AM AST

SAN JOSÉ — E periodista Camilo Rodríguez, di 51 aña, a wordo asesina dialuna 16 di november, riba pleno luz di dia, mientras e tabata conduci su pick-up riba un caminda pafo di capital di Costa Rica, San José. Segun autoridadnan local, desconocidonan riba un motocicleta a tira riba dje. Ora personal di Cruz Cora a yega, e periodista tabata morto caba.

Rodríguez tabata conoci pa su investigacionnan tocante narcotrafico y corrupcion. Via social media, e tabata publica videonan den cual e tabata denuncia supuestonan conexion entre huesnan, abogadonan, politiconan y organisacionnan criminal.

Presidenta Laura Fernández a condena e asesinato, calificando esaki como un acto cobarde y un menasa pa libertad di expresion. Rodríguez anteriormente a acusa Fernández di envolvimento den narcotrafico, acusacionnan cu e presidenta semper a nenga. Na cuminsamento di e aña aki, el a presenta un demanda pa difamacion contra e periodista.

Procurador General Carlo Díaz a confirma cu investigacion ta den curso, pero ainda no tin detencion.

E asesinato ta pone atencion atrobe riba e creciente violencia relaciona cu narcotrafico na Costa Rica, cu den ultimo añanan a bira un ruta importante pa envio di cocaine pa Europa.

Ta e prome asesinato di un periodista den e pais den mas di dos decada. Na 2001 periodista Parmenio Medina a wordo asesina, sigui pa Ivannia Mora na 2003.