Touroperadornan ta pidi mediacion: “Regula, pero no cera tur cos”

ORANJESTAD — E companianan di tour representa pa abogadonan Anthony Ruiz y Milaynie Reinkemeyer ta pidi un solucion cu ta combina proteccion di naturalesa cu actividad turistico regula. Durante e tratamento di e caso UTV y ATV den corte diahuebs, nan a rechasa un ceramento general inmediato di e areanan involucra y a propone mediacion pa yega na un acuerdo. E abogadonan a representa por lo menos ocho compania di tour. Segun Ruiz, otro empresanan den e sector ta comparti e mesun posicion: reglanan cla, rutanan delimita y control efectivo, en bes di un prohibicion cu por afecta continuidad di nan negoshinan. “Nos ta habri pa mediacion,” Ruiz a declara, pidiendo un oportunidad pa e partidonan busca un solucion den un ambiente confidencial.

RUIZ TA MIRA OPORTUNIDAD PA ACUERDO

Segun Ruiz, e conbersacionnan di ultimo luna a mustra cu tin espacio pa regula e sector. El a reconoce tambe e contribucion di Aruba Birdlife Conservation (ABC) na e proceso. “Mester ta honesto: tur credito pa Birdlife,” el a declara, señalando cu e presion pa atende e problema a contribui na e disposicion pa establece reglanan. Ruiz a menciona rutanan obligatorio, velocidad maximo, limitacion di cantidad di UTV y multanan como elementonan cu por forma parti di un acuerdo. Segun e, e touroperadornan ta dispuesto pa acepta supervision di un administrador, sempre y cuando cu tin reglanan cla pa aplica. El a argumenta cu mediacion por yuda supera e desconfianza entre e partidonan. Segun su relato, e touroperadornan a pidi ABC pa indica riba terreno caminda un ruta por pasa cu e menor impacto posibel, pero e cooperacion ey no a materialisa.

REINKEMEYER: CERAMENTO POR AFECTA TRABAO Y INVERSION

Den e argumento presenta pa Reinkemeyer, e empresanan a enfatisa cu e exigencianan di ABC por tin consecuencianan duradero pa nan operacion, inversion, obligacionnan contractual y empleadonan. Segun e defensa, e companianan involucra ta ofrece trabao na centenares di hende, cu famianan cu ta depende di e entradanan ey. “E touroperadornan ta reconoce e importancia di proteccion di naturalesa completamente,” e abogado a declara. Pero, segun nan posicion, e reconocemento ey no ta hustifica automaticamente un ceramento general, inmediato y incondicional. E defensa a sostene cu interes di naturalesa, turismo, empleo y empresariado mester wordo evalua hunto. Esaki, segun e abogadonan, no ta nifica cu interes economico mester prevalece semper riba proteccion ambiental.

SECTOR KIER REGLA PA COMBATI ACTIVIDAD IRRESPONSABEL

E empresanan a argumenta cu nan mes ta sufri di e falta di regulacion. Segun e defensa, operadornan sin e permisonan necesario, comportamento irresponsabel y incidentenan cu usadornan ta causa daño na reputacion di e sector completo. “Nan no tin interes den continuacion di un situacion sin regulacion,” Reinkemeyer a declara. Segun e argumento, deterioro di naturalesa ta afecta tambe e base di nan negoshi: un paisahe daña ta perde su atractivo como destino pa excursion. P’esey, nan ta pidi un sistema cu rutanan designa, condicionnan di uso, supervision, control y monitoreo di impacto ambiental.

PETICION PA DATONAN ACTUAL

E abogadonan a cuestiona si e informacion presenta pa ABC ta suficiente pa hustifica un ceramento completo di tur e areanan menciona. Nan a pidi investigacion actual y specifico tocante presencia di especie protehi, ubicacion di neishi, intensidad di trafico, erosion, stof y boroto. Tambe nan a cuestiona e alcance geografico y actualidad di cierto clasificacion ambiental usa den e proceso. Segun e defensa, mester determina prome si medidanan menos drastico — manera limitacion di horario, velocidad, cantidad di vehiculo y acceso riba rutanan specifico — por brinda suficiente proteccion. E afirmacionnan aki ta forma parti di e argumento di e empresanan; nan no ta conclusionnan di Corte.

OBHECION CONTRA RESTRICCION DI IMPORTACION

E defensa a obheciona e medidanan solicita cu por limita importacion y reemplaso di ATV y UTV tambe. Segun e abogadonan, esaki por afecta e operacion di e dealer y importador involucre directamente, incluyendo bestellingnan pendiente, garantia y obligacionnan di servicio. Nan a argumenta cu restriccionnan asina ta bai mas leu cu proteccion di e areanan specifico y ta exigi un hustificacion propio tocante necesidad y proporcionalidad.

HUEZ TA LAGA PUERTA HABRI PA MEDIACION

Despues di e peticion di Ruiz, huez a indica cu si e partidonan yega na acuerdo pa drenta den mediacion, nan mester informa Corte a mas tarda un siman prome cu e fecha fiha pa sentencia. Esaki no ta nifica cu mediacion ya a wordo acorda. E posibilidad ta depende di disposicion di e partidonan pa participa. E defensa a conclui pidiendo rechaso di e exigencianan di ABC, manteniendo cu un solucion regula ainda ta posibel.

Segun e abogadonan, e diferencia di opinion tocante detaye di rutanan y control no ta demonstra cu dialogo no por funciona, sino cu ainda tin trabao pa yega na un acuerdo cu ta proteha naturalesa y permiti turismo responsabel.