Corte: Gobierno ta rechasa ceramento general pa UTV y ATV

ORANJESTAD — Gobierno ta reconoce e necesidad di proteha naturalesa, pero ta sostene cu esaki no ta nifica cu tur trafico motorisa mester wordo exclui di e areanan involucra den e caso di Aruba Birdlife Conservation (ABC). Durante e audiencia  den corte diahuebs den e caso popularmente yama “Caso UTV”, abogado Darren Crouch, cu a representa Land Aruba den e asunto di Ministerio di Infrastructura di minister René Herdé, a pidi huez pa declara ABC no admisibel den su demanda, of, alternativamente, rechasa su exigencianan. Segun Crouch, e conflicto ta relaciona cu e forma di regula acceso y aplica reglanan, mientras Gobierno mester considera tanto proteccion di naturalesa como interes di empresanan, poblacion y acceso pa servicionan di emergencia. “Land ta reconoce e importancia di proteccion di naturalesa, paisahe y areanan ecologicamente vulnerabel,” e abogado a declara. Sinembargo, segun e, ABC no a demonstra suficientemente cu e medidanan specifico cu e ta exigi tin e base legal y urgencia necesario pa wordo ordena den un kort geding.

RO​​PV NO TA CONTENE UN PROHIBICION GENERAL

Un di e argumentonan principal di Crouch ta cu e Ruimtelijk Ontwikkelingsplan met Voorschriften (ROPV) 2021 ta haci distincion entre diferente destinacion di tereno y e actividadnan permiti. “E ROPV 2021 no ta contene un prohibicion general riba trafico motorisa, sino un sistema diferencia di regulacion,” el a declara. Segun e interpretacion di Gobierno, den e destinacion naturaleza y paisahe, trafico motorisa por wordo permiti riba camindanan y rutanan designa pa e administrador, durante horarionan determina. Pa tereno cu destinacion ‘strand’, e abogado a reconoce cu tin un regimen diferente, cu no ta permiti uso recreativo di vehiculonan motorisa, salvo pa administracion y supervision. Crouch a argumenta cu ABC ta pidi medidanan cu ta bai mas leu cu e obligacionnan cu ta surgi directamente for di e ROPV.

GOBIERNO KIER EHECUTA SU PROPIO PLAN

Segun Crouch, Gobierno a dedica hopi ora na dialogo cu ABC y e touroperadornan. El a declara cu e sector a mustra disposicion pa acepta geofencing, un sistema digital pa controla e area di circulacion, un limite di velocidad di 20 kilometer pa ora y supervision di e cumplimento cu reglanan. E abogado a sigui bisa cu despues di e ultimo reunion diamars, Gobierno a manda un proposicion adicional pa discuti e siguiente dia. Segun su relato, ABC a dicidi no participa den e reunion ey. “No por wordo bisa cu no a wordo purba,” Crouch a declara. El a indica cu Gobierno ta dispuesto pa designa rutanan, instala barreranan, registra entrada di UTV y organisa control. E ehecucion di e plan, segun e, no por depende di un acuerdo entre tur e partidonan. “E decision final tocante rutanan y medidanan di proteccion ta responsabilidad di e autoridad competente y no por depende di aprobacion di e partidonan aki,” el a declara.

CONSEHONAN TECNICO Y ESTUDIO AMBIENTAL

Crouch a reconoce e importancia di e informe di 2022 y e conseho conjunto di DOW, DIP y DNM di september 2026, cu ABC a usa pa sostene su demanda. Pero, segun e, e documentonan ta contene puntonan di salida y proposicionnan tecnico, cu no ta automaticamente un decision definitivo of un orden cu por wordo exigi dilanti huez. E a referi tambe na un email di Directie Natuur en Milieu (DNM) di 12 di october, cu, segun Gobierno, ta mustra aceptacion di un proposicion temporal pa Tera Cora, sempre cu e ahustenan recomenda pa e departamento wordo incorpora. Crouch a enfatisa cu Gobierno no ta presenta esaki como un aprobacion incondicional di un ruta permanente. Un estudio di impacto ambiental ta keda importante pa e decision definitivo.

OBHECION CONTRA PIEDRANAN Y PROHIBICIONNAN AMPLIO

E abogado a cuestiona e exigencia pa blokea areanan cu cantidad grandi di piedra. Segun e, Gobierno mester considera disponibilidad di material, impacto riba paisahe, posibilidad di control y acceso pa ambulans, otro servicionan di emergencia y Wardacosta. Tambe el a obheciona exigencianan cu ta afecta permiso, importacion of reemplaso di vehiculonan den e sector completo. Segun Crouch, ABC no a splica suficientemente pakico proteccion di e areanan specifico ta hustifica restriccionnan asina amplio, incluyendo uso di vehiculo riba caminda publico.

DISCUSION TOCANTE E VIA HUDICIAL

Gobierno a argumenta ademas cu e peticion pa obliga aplicacion di reglanan di ROPV mester wordo atende via e procedimento administrativo. Segun Crouch, ABC por solicita e autoridad competente pa actua y, si e peticion wordo rechasa, uza e posibilidadnan di bezwaar y recurso bou di e LAR. E abogado a cuestiona tambe pakico e medidanan solicita ta necesario inmediatamente, teniendo cuenta cu e problema ta existi hopi tempo y cu ABC mes a mustra disposicion pa considera acceso temporal bou di condicionnan. Na final di su argumento, Crouch a pidi Corte pa duna Gobierno espacio pa ehecuta su propio regimen temporal di proteccion y acceso regula. E posicion presenta ta e defensa di Land Aruba den e proceso. Huez ainda mester evalua e argumentonan di e diferente partidonan y dicidi riba e demanda di ABC.