Stimami Sterilisami ta stop programa pa falta di financiamiento

ORANJESTAD — Fundacion Stimami Sterilisami a anuncia cu a pone fin na su programa di subsidio pa sterilisacion y castracion di cacho y pushi, efectivo 10 di november 2026, despues di a financia mas cu 52.000 intervencion riba Aruba. Proceduranan cu ya tabata programa lo wordo cubri te cu 15 di november.

E decision ta consecuencia di falta di fondo, particularmente pasobra contribucionnan publico cu tabata confirma no a materialisa. Segun e fundacion, Bucuti & Tara Beach Resort a contribui mas cu Afl. 3 miyon di su propio recurso durante casi 12 aña, incluyendo Afl. 400.000 adelanta e aña aki pa mantene e programa funcionando.

Stimami Sterilisami a nace na 2016 como iniciativa di Yesenia Farro-Arends y Bucuti & Tara, cu e meta di haci sterilisacion accesibel pa tur doño di mascota, sin cu falta di placa ta un impedimento.

Durante e añanan, e programa a conta cu colaboracion di veterinario, organisacionnan di rescate, voluntarionan y donadornan, incluyendo One Love Foundation, Animal Welfare Alliance Aruba y Luna Foundation Aruba.

E fundacion ta indica cu Gobierno actualmente ta evaluando posibilidadnan pa continua cu un programa di sterilisacion y castracion na nivel nacional. Sinembargo, e ta enfatisa cu, ademas di sterilisacion, ta necesario pa Gobierno aplica leynan existente di manera consistente y introduci cambionan sustancial den legislacion pa atende cu e causanan di problema di animalnan abandona.

Stimami Sterilisami ta cera e etapa aki cu un agradecimento na tur esnan cu a contribui, mientras e ta expresa speransa cu e trabou lo continua cu un financiamiento stabil y confiabel.