Eman ta pidi hotelnan grandi contribui mas na Carnaval di Aruba

ORANJESTAD — Durante apertura oficial di Carnaval 73, Prome Minister y Minister di Cultura Mike Eman a haci un apelacion na e hotelnan grandi di Aruba pa contribui mas financieramente na organisacion y desaroyo di Carnaval.

E ceremonia a tuma luga dia 11 di november na Aruba Tourism Authority (ATA), caminda temporada di Carnaval a habri simbolicamente pa 11:11 di mainta, cu presencia di presidente nobo di Stichting Maneho di Aruba su Carnaval (SMAC), Rusette Croes, y CEO di ATA, Ronella Croes.

Segun Eman, Carnaval no ta solamente un tradicion cultural, sino tambe un parti importante di e producto turistico di Aruba. E mandatario a señala cu, mientras ATA ta sostene Carnaval, e ta sinti falta di un contribucion mas grandi di algun hotel importante cu ta beneficia di turismo.

Eman a pidi Ronella Croes pa acerca e hotelnan y enfatisa e importancia di nan participacion financiero, pa organisadornan y gruponan di Carnaval por dispone di mas recurso.