Wyatt-Ras: Gobierno no por duna hospital un cheque blanco sin investigacion

ORANJESTAD — Minister di Salud Mervin Wyatt-Ras a reacciona pa prome biaha publicamente riba e crisis financiero cu Hospital Dr. Horacio E. Oduber (HOH) ta atravesando, defendiendo e posicion di Gobierno di no entrega mas fondo sin un investigacion profundo di e situacion financiero. Segun e minister, ta trata di placa publico y Gobierno tin obligacion di responsabilisa cada florin cu ta wordo gasta.

E reaccion ta bin despues di declaracionnan di presidente di ABV y di hospital, Gina Maduro, kende a critica e falta di accion y sosten financiero di Gobierno. Maduro a indica, entre otro, cu Minister di Salud mester haci uso di articulo 2A di ley di AZV pa duna direccion y yuda resolve e situacion.

Wyatt-Ras a rechasa e impresion cu Gobierno no ta haci nada pa yuda hospital. Segun e, ora hospital a informa na juni di e aña aki cu e ta enfrenta problemanan financiero, e noticia a sorprende Gobierno, cu inmediatamente a dicidi di inicia investigacionnan. "Nos no por duna un suma di placa asina numa. Ta trata di placa di pueblo. No por duna un instituto placa sin por responsabilisa. Esey ta manera duna un cheque blanco," e minister a declara.

Segun Wyatt-Ras, Gobierno a determina dos investigacion. E prome ta un root cause analysis, destina pa determina e causanan fundamental di e crisis financiero. E di dos, bou di direccion di profesor Jurison, lo examina e diferente servicionan cu hospital ta ofrece, nan costo y con por establece un sistema di financiamiento mas structural.

E minister a enfatisa cu sin informacion completo y confiabel, Gobierno no por adopta solucionnan financiero cu lo ta sostenibel pa futuro.

Un otro punto cu Wyatt-Ras a toca ta e investigacion cu firma Deloitte aparentemente a ehecuta anteriormente. Segun e minister, Gobierno no a ricibi e informe final y, conforme su informacion, e documento existente ainda ta den fase di concepto.

Riba e desacuerdo, Wyatt-Ras ta sostene cu Gobierno ta actuando pa evita cu servicio medico na hospital ta wordo afecta. Durante su declaracion el a menciona tambe un aporte di Afl. 5 miyon cu recientemente a wordo otorga, sin aclara completamente den e reaccion con e suma ey ta relaciona cu e necesidadnan financiero total di hospital. "Cuido di hospital no por baha. E no por core peliger. Esey ta e interes di nos Gobierno," Wyatt-Ras a enfatisa.

E minister a expresa su deseo pa mantene dialogo cu directiva di hospital y e organisacionnan sindical. Sinembargo, el a indica cu hospital mester entrega e informacion financiero necesario pa por acelera e investigacionnan.

Gobierno ta aspira pa finalisa por lo menos un di e investigacionnan na december. Segun Wyatt-Ras, cada retraso den entrega di informacion ta retrasa tambe e posibilidad di yega na un solucion.

Durante su reaccion, e minister a critica e comparacion cu ta wordo haci cu Gobierno anterior. El a recorda cu, segun e, durante pandemia di COVID-19 a corta Afl. 60 miyon den financiamento relaciona cu cuido medico y tambe a aplica reduccion salarial.

E declaracion aki ta agrega un dimension politico na e controversia financiero di hospital, mientras cu e pregunta central ta keda con y ki ora Gobierno, AZV y hospital lo logra un acuerdo cu ta garantisa continuidad di cuido medico.

Wyatt-Ras a rechasa e expectativa cu un problema cu, segun dje, ta resultado di añanan di falta di atencion por wordo soluciona di un momento pa otro. "Bo no por tira placa den algo sin sa kico ta pasando. E descuido di añanan no por wordo soluciona den un minuut," e minister a argumenta.

Na final di su declaracion, Wyatt-Ras a haci un apelacion na comunidad pa mantene calma, asegurando cu bienestar di pashentnan ta prioridad di Gobierno. "E pashent mester ta number un. Pa nos, pa Gobierno, e pashent ta number un."

E reaccion di minister ta pone enfasis riba necesidad di investigacion y responsabilidad financiero, pero no ta ofrece ainda un fecha concreto pa un acuerdo structural entre Gobierno, AZV y hospital. Mientras tanto, incertidumbre tocante financiamiento di HOH ta continua.