Agente di biahe na Merca deteni pa fraude cu paketenan di vakantie, incluyendo Aruba

ORANJESTAD — Un agente di biahe di West Virginia, Merca, a wordo deteni y ta enfrenta 32 acusacion penal relaciona cu un investigacion di fraude cu paketenan di vakantie pa diferente destinacion, incluyendo Aruba.

Michelle Pauley-LaMaster, di 47 aña, residente di Charleston, ta wordo acusa, entre otro, di fraude, fraude computacional, uso no autorisa di medio di pago y emision di cheque sin fondo.

Segun West Virginia State Police, e investigacion a cuminsa despues di kehonan di clientenan tocante cobronan no autorisa riba nan tarheta di credito y irregularidadnan cu pagonan haci na agencia LaMaster Travel LLP.

Documentonan hudicial ta indica cu varios cliente a perde miles di dollar na reservacionnan di vakantie pa Aruba, Jamaica y Noruega. Algun cliente a declara cu, apesar di a paga pa ticket di avion y estadia den hotel, nunca nan a ricibi confirmacion di nan reservacion.

Den un caso, un cliente a reclama devolucion di mas cu USD 6.000 pa cobronan no autorisa relaciona cu un vakantie na Disney. LaMaster ta wordo acusa di a entrega un cheque sin fondo pa cubri e diferencia.

Autoridadnan ta investiga posibilidad cu tin mas victima cu ainda no a wordo identifica. No ta exclui cu lo sigui mas acusacion.

Aruba ta figura como un di e destinacionnan menciona den e kehonan, pero e informacion disponibel no ta indica cu empresanan turistico na Aruba tabata envolvi den e supuesto fraude.