Huez ta bolbe rechaza libertad di Fernandez Pedra: “E caso a sacudi e orden huridico seriamente“

ORANJESTAD — Sospechoso Fernandez Pedra lo keda deteni den e caso di e accidente fatal cu a costa bida di dos peaton riba L.G. Smith Boulevard. Durante e sesion diabierna, huez a rechaza libertad bao condicion y a fiha continuacion di e caso pa 4 di november, pa 1:30 di merdia, cu un advertencia cla pa e acusado: Percura pa tin un abogado!.

DOBLE ASESINATO

Huez a señala cu Fernandez Pedra ainda ta sospecha di e acusacion mas grave, cu e la describi como “doble asesinato”, y cu ta trata di hechonan cu ta sacudi e orden huridico seriamente. E referencia aki ta concerni e sospecha contra e acusado; no ta un declaracion di culpabilidad. “Mi no ta mira espacio pa laga bo bay bao condicion na e momento aki,” e huez a declara.

E CASO

E caso ta relaciona cu e incidente di 4 di januari 2026, cerca di Wind Creek Casino, den cual Josely Paulina Vasquez Gonzalez y Carlos David Vialez Valerio a perde nan bida. Segun e acusacion cu Noticiacla a publica anteriormente, Fernandez Pedra tabata stuur un Jeep Compass sin rijbewijs valido y bao influencia di alcohol. E dossier ta inclui tambe acusacion di bandona lugar di accidente y intento di homicidio relaciona cu dos otro peaton. noticiacla.com

Cu e decision di huez, Fernandez Pedra ta keda den detencion preventivo, mientras e tratamento integral ta programa pa 4 di november pa 1’or y mei di merdia. E acusacionnan ainda mester wordo proba dilanti Corte.