Tourism 3.0 ta propone Afl. 300 pa luna pa yuda 1.000 famia cu hypotheek

ORANJESTAD — Un propuesta importante den e draft Tourism 3.0 ta crea un fondo di Afl. 25 miyon entre 2027 y 2031 pa yuda famianan cu ta casi cualifica pa un hypotheek, pero cu ainda no ta pasa e ultimo criterio financiero di banco.

E asina yama Housing and Mortgage Access Facility ta apunta na aproximadamente 1.000 hypotheek. Di e Afl. 25 miyon, te Afl. 18 miyon ta reserva pa subsidio directo y te Afl. 7 miyon pa administracion, preparacion di solicitantenan, supervision y cierto proteccion di riesgo.     

Segun e diseño, un famia elegibel por haya un subsidio maximo di Afl. 300 pa luna, cu un maximo total di Afl. 18.000 durante cinco aña. E grupo su meta ta pa hogar cu entrada bruto mensual entre aproximadamente Afl. 3.500 y Afl. 5.000.     

E programa ta parti di un intento pa habri acceso na cas pa famianan cu tin entrada estable y por carga mayoria di e hypotheek, pero cu ta keda afo door di costo di tera, down payment, gasto di cierre of e ultimo test di affordability.

E plan ta proyecta cu e fondo por mobilisa entre aproximadamente Afl. 208,6 miyon y Afl. 216,5 miyon den inversion total den vivienda. Banco lo sigui tin responsabilidad pa haci nan evaluacion normal di credito, y e subsidio no ta destina pa un di dos cas, vacation rental of compra speculativo.

Gobierno ta liga e medida na disponibilidad di tera y construccion di cas: segun e draft, solamente subsidia demanda sin crea oferta nobo por aumenta prijsnan di vivienda. E programa ta planifica pa cuminsa na 2027, pero ta keda suheto na aprobacion final.