ACF ta restaura habitatnan na Aruba door di yuda naturalesa recupera su mes

ORANJESTAD — Aruba Conservation Foundation (ACF) a dedica e edicion mas reciente di su programa Naturalesa ta Papia: Encuentro di Conocemento na restauracion di habitat terrestre y na e capacidad di naturalesa pa recupera ora e presionnan cu ta stroba su regeneracion wordo reduci.

Durante sesionnan na MFA Paradera y Teresita Center San Nicolas, ACF a splica con Aruba su paisahe terrestre a cambia door di presion humano, incluyendo cabrito, burico y cabay cu ta cana liber, matanan invasivo, erosion, disturbio di suela, secura y perdida di fuentenan di simia.

Un di e mensahenan principal tabata cu restauracion ecologico no necesariamente ta nifica planta mas mata. E enfoke ta cuminsa cu analiza condicion di e ecosistema, identifica kico ta impidi recuperacion y determina cua intervencion ta realmente necesario.

ACF ta aplica e metodo Assisted Natural Regeneration (ANR), cu ta enfoca riba kita of reduci presionnan, proteha vegetacion cu ya ta creciendo y permiti naturalesa regenera cu e minimo intervencion necesario. Monitoreo continuo ta determina si e habitat realmente ta recuperando.

E metodo ya ta wordo aplica na Aima Coa den Parke Nacional Arikok, unda aproximadamente 3.6 hectare di sabana seco ta forma parti di e prome proyecto piloto di ANR. ACF ta calcula cu por tuma minimo cinco aña prome cu por observa señalnan cla di recuperacion.

ACF ta enfatisa cu comunidad tambe por contribui door di scoge matanan nativo, evita propagacion di especie invasivo, proteha vegetacion cu ta regenera naturalmente y tene bestianan manera cabrito controla.

Segun ACF, e principio fundamental ta simpel: prome cu restaura, mester proteha. Cada habitat cu Aruba logra conserva awe, ta un habitat cu mañan posiblemente no mester wordo restaura.