Emilio ta regresa Aruba cu prothese nobo despues di tratamento

ORANJESTAD — Emilio van der Linde lo regresa Aruba diahuebs 24 di september pa 2:15 di atardi, despues di a ricibi un prothese y rehabilitacion na Shriners Children’s Texas. Aruba Shriners Club ta invita comunidad pa dune un caluroso bon bini na aeropuerto.

Durante celebracionnan di Aña Nobo, Emilio tabata riba caminda pa trabou ora un auto, cu segun Aruba Shriners Club tabata wordo bestuur pa un chauffeur bou influencia, a dal e. Como consecuencia di e accidente grave, Emilio a perde un pia e siguiente dia.

Aruba Shriners Club a interveni y percura pa Emilio biaha pa Merca dia 15 di juni. Eynan el a ricibi un prothese y tratamento di fisioterapia, sin gasto pa e mes ni su famia.

Aunke su bida a cambia drasticamente, Emilio a sigui lucha pa adapta y siña cana cu su prothese nobo. Segun Aruba Shriners Club, su recuperacion ta progresando rapidamente.

E organisacion ta invita pueblo di Aruba pa reuni na aeropuerto diahuebs pa 2:15 di atardi y demostra sosten na Emilio ora el yega bek na su isla.

Aruba Shriners Club ta funciona bou di Shriners Fort Myers. Ambos ta forma parti di Shriners International, un organisacion cu ta brinda cuido medico specialisa na muchanan, independiente di capacidad financiero di nan famia. Su red di 22 facilidadnan na Merca, Canada y Mexico ta enfoca entre otro riba cuido ortopedico, quemadura y lesion di spinal cord.