Oduber ta rechasa sentencia y acusa sistema hudicial di “midi cu dos midi”

ORANJESTAD — Ex minister Otmar Oduber a tene un conferencia di prensa dialuna mainta, den compania di su abogadonan, pa reacciona riba e sentencia di Gemeenschappelijk Hof van Justitie den caso Flamingo. Hof a conden’e na dos aña di prizon incondicional y a excluyie durante cinco aña di ocupa un funcion publico y di wordo eligi den un organo representativo.

Oduber a bisa cu, aunke e ta respeta e decision tuma pa e hueznan, e no ta acepta e resultado.

“Mi persona lo respeta e decision cu juez a tuma, pero nunca lo mi acepta e decision aki. E no solamente ta un abuso, sino tambe definitivamente inhusto,” Oduber a declara.

Segun e ex minister, Hof no a evalua e contexto administrativo y politico suficientemente den cual e decisionnan menciona den e caso a wordo tuma. El a sostene cu practicanan cu durante añanan tabata considera normal den administracion publico, awor ta wordo interpreta como acto criminal. “Nan ta cambia algo cu semper tabata normal y ta convertie den algo criminal, solamente pa por condena un minister mas,” el a bisa.

Oduber a argumenta cu e manera di traha existente dentro di gobierno ta relaciona directamente cu continuidad, stabilidad y calidad di servicio na ciudadanonan. Segun e, Corte no a tuma e realidad aki suficientemente na cuenta ora di evalua su actuacion como minister.

CRITICA RIBA RAZONAMENTO DI HOF

Durante e conferencia, Oduber a cuestiona diferente parti di e razonamento usa den e sentencia. Segun e, den diferente pasashi Hof ta usa formulacionnan manera “Hof ta considera” of “Hof ta kere”, algo cu, den su opinion, ta indica cu e condena ta basa riba interpretacion y no riba prueba concreto.

E ex minister a insisti cu Ministerio Publico no a logra proba cu el a comete fraude of cu el a ricibi placa of otro beneficio personal pa haci fabor. “Nan no por a proba ni un fraude cu mi a comete. E unico cos cu nan tin contra mi ta cu mi a yuda hende haya trabou,” Oduber a bisa.

El a agrega cu durante su periodo como minister el a yuda personanan haya trabou, tanto den aparato gubernamental como den sector priva. Segun e, e personanan cuestiona a sigui proceduranan y tabatin vacaturanan habri.

Oduber a rechasa e interpretacion cu sosten politico expresa despues di un nombramento automaticamente ta constitui un compensacion pa e ayudo ricibi. El a señala cu algun di e personanan a expresa na terceronan cu nan lo apoy’e, pero no a haci un promesa directamente na dje como condicion pa haya trabou.

ACUSACION DI “DOS MIDI”

Oduber tambe a acusa e sistema hudicial di aplica “dos midi”. Como ehempel, el a menciona peticionnan cu, segun e, funcionario Hulandes y Europeo a haci na Gobierno pa ehecuta trabounan manera asfaltamento cerca oficina di Ministerio Publico y na e residencia destina pa Gobernador.

El a cuestiona di con peticionnan asina ta considera aceptabel, mientras un peticion similar relaciona cu un ciudadano Arubiano — cu el a identifica como Rubiano — ta wordo interpreta como abuso di funcion.

“Loke ta pasando aki ta un porkeria. Hulandesnan y Europeonan tambe ta haci e cosnan aki na Aruba,” Oduber a declara den un di e momentonan mas fuerte di e conferencia.

E ex minister tambe a referi na articulo 119 y na cambionan legal aproba pa Parlamento relaciona cu e manera cu mandatario politico por wordo investiga y persegui penalmente. Segun e, Gobierno ainda no a regla e ehecucion necesario di e ley, pasobra tin miedo pa reaccion for di Hulanda.

CASO FLAMINGO Y SENTENCIA ANTERIOR

Caso Flamingo ta relaciona cu actuacionnan durante e periodo 2017–2019, tempo cu Oduber tabata minister di Ordenacion Espacial, Infrastructura y Medio Ambiente.

E caso ta consisti di diferente expediente, entre otro dossier Malmok, relaciona cu otorgamento di dos tereno di erfpacht, y e caso di e dos asina yama “spookambtenaren” Thiel y Phillips.

Hof no a considera tur acusacion den dossier Malmok proba. Sin embargo, a considera proba cu Oduber a abusa di su funcion den e proceso di otorgamento di tereno y cu Pais Aruba a wordo engaña den e construccion relaciona cu e dos trahadornan.

Na januari 2025, Gerecht den Prome Instancia a condena Oduber na un aña di prizon, di cual 319 dia tabata condicional, hunto cu 240 ora di trabou comunitario. Tanto Oduber como Ministerio Publico a apela e sentencia: Oduber a busca absolucion completo, mientras Ministerio Publico a considera e castigo demasiado leve y a exigi tres aña di prizon incondicional.

Den apelacion, Hof a aumenta e castigo na dos aña di prizon incondicional. Ademas, Oduber no por ocupa un funcion publico ni wordo eligi den un organo representativo durante cinco aña.

CASACION AINDA BOU CONSIDERACION

Oduber no a confirma ainda si e lo recurri na casacion. El a reconoce cu e decision ta dificil, tanto emocionalmente como financieramente. “Na dado momento gasolin ta caba y nos a gasta hopi placa caba,” el a bisa.

E ex minister lo busca conseho huridico prome cu tuma un decision final. Sinembargo, el a enfatisa cu no lo bay casacion simplemente pa gana tempo. Segun e, e lo sigui cu e siguiente paso solamente si su abogadonan conclui cu tin un posibilidad real pa e sentencia wordo revoca.

Oduber y Ministerio Publico tin dos siman, conta for di fecha di sentencia, pa institui casacion.