Na Corsou SITEK a declara welga escolar pa exigi mas seguridad

WILLEMSTAD — Sindicato SITEK a declara welga escolar awe mainta pa tur trahado den enseñansa y transporte escolar na Corsou. E accion ta sigui e incidente di diabierna pasa, den cual un alumno a corta un maestro cu un cuchiu ora esaki a interveni den un bringamento.

Presidente di SITEK, Darius “Lio” Plantijn, a bisa cu no tin personal adulto na scolnan awe mainta y a convoca trahadonan pa reuni 8’or na sede di sindicato. Segun e, miembronan a exigi accion pasobra nan seguridad y trankilidad na trabou ta den peliger.

Plantijn tambe a critica ministro di Husticia, Shalten Hato, kende, segun e, a cuestiona e manera cu SITEK a declara e welga durante un combersacion telefonico cu ministro di Enseñansa Sithree van Heydoorn. Plantijn a enfatisa cu SITEK ta un sindicato independiente y cu welga ta un derecho democratico.

E presidente sindical ta acusa Gobierno y Parlamento di no atende   e seguridad di trahadonan den enseñansa suficientemente. Tambe el a critica directivanan di scol cu a informa cu lesnan ta sigui normalmente of cu ta manda trahadonan na ARBO ora nan participa den welga.