R/V Hydra a descubri naufragionan no identifica bou awa di Aruba

ORANJESTAD — E boto di investigacion R/V Hydra, maneha pa organisacion filantropico Inkfish, ta realisando investigacion cientifico den awanan di Aruba.

Durante apenas cuatro dia, e ekipo a detecta naufragionan tanto na sitionan conoci como na sitionan anteriormente no identifica. E investigacion ta conta tambe cu participacion di Harold Kelly di Museo Arqueologico Nacional Aruba (MANA) y Oriana Wouters di IDNOVA.

E ekipo a haci investigacion na Jane Sea, avionnan na Arashi y ES Antilla. Na Antilla, nan a colecta imagen bou di awa y muestranan di awa pa estudia biodiversidad y posible patogenanan relaciona cu rif. Tambe a crea un modelo virtual 3D di e naufragio.

Durante e siguiente dos simannan, Inkfish y MANA lo sigui explora, identifica y documenta Aruba su herencia cultural bou di lama.