OIG: Inversionistanan a cansa y kier accion di Gobierno awor

ORANJESTAD — Oranjestad Investment Group (OIG) a bisa diahuebs cu inversionistanan cu a compromete miyones di florin pa revitalisa centro di Oranjestad ta perdiendo pasenshi debi na falta di decisionnan concreto di Gobierno.

Segun OIG, durante e ultimo lunanan a tene reunion cu Minister di Asuntonan Economico, Prome Minister y Minister di Infrastructura. Den diferente momento, a priminti anuncionan, reunionnan y solucionnan dentro di plasonan specifico, pero e plasonan a pasa sin cu e accionnan anuncia a materialisa.

E grupo ta señala cu inversionistanan ya a cumpra propiedad, regla financiamento y desaroya proyectonan, pero algun iniciativa no por sigui sin claridad tocante proceduranan, regulacionnan y posibilidadnan di desaroyo.

OIG ta adverti cu algun inversionista ta cuminsa considera si nan mester sigui warda riba Oranjestad of move nan capital pa otro caminda.

Aunke e grupo ta reconoce e incentivonan fiscal pa stimula inversion den centro, OIG ta bisa cu incentivonan so no ta suficiente sin decisionnan, claridad regulatorio y un calendar cla pa implementacion.

OIG ta pidi Gobierno pa presenta solucionnan concreto por escrito, convoca e reunion cu stakeholdernan y actua awor.