A cuminsa cu restauracion di 'California Lighthouse'

ORANJESTAD - Trabounan a cuminsa oficialmente awe pa restauracion di e faro na 'California', conoci popularmente como e California Lighthouse. Ta considera esaki como un icono turistico y cultural cu pa hopi aña tabata sclama pa atencion. Y awor e lo haye unda e lo resalta for di leu pa nos hendenan y nos bishitantenan disfruta di dje pafor y paden, convirtiendo su mes un biaha mas den un mahestuosidad na e parti west di nos isla y guiando e botonan riba lama.

TRABOUNAN DI RESTAURACION

Despues di e destaho publico cu a tuma luga awor a otorga e proyecto aki na ECOARUBA Line Development NV. E ta un proyecto di mas of menos 1 miyon Florin y ta planea pa cuminsa aproximadamente pa 24 di september 2015. Cu esaki tambe e contratista a haya 170 dia cual ta aproximadamente 8 luna pa finalisa cu e trabou. Na final California Lighthouse cu ta un di nos puntonan turistico principal lo keda habri pa publico por disfruta dje. Intencion ta pa patrimonionan cultural bolbe bin bek den nan gloria di antaño, den bon condicion, pa e publico general por haci uzo di nan y siña conoce, y sa nos historia miho.