CEO di ATA ta defende uso di fondo di ATA contra critica politico

ORANJESTAD – CEO di Aruba Tourism Authority (ATA), Ronella Croes, a defende uso di fondo di e organisacion despues cu durante entrevista cu Noticiacla el a wordo confronta cu critica di politiconan na Aruba, cu ta sugeri cu placa di ATA ta wordo uza pa proyecto(nan) cu, segun nan, no tin relacion directo cu turismo. Durante e entrevista, Tito Laclé a puntra Croes con e ta reacciona riba e criticanan politico tocante uso di fondo di ATA pa asunto manera limpieza y otro proyecto cu algun politico ta considera responsabilidad di Gobierno y no di e autoridad turistico.

ROL DI ATA A CAMBIA 

Croes a responde cu e rol di ATA a cambia desde 2014 y cu e organisacion no ta funciona solamente como un entidad pa promociona Aruba den exterior. “Desde 2014 caba bo ta mira un ATA cu tin mas enfoke riba e producto turistico,” Croes a declara. Segun e, e cambio a resulta despues di un proceso cu participacion amplio di stakeholder y asesoria di un compania internacional, cu a yuda move ATA di un Destination Marketing Organization pa un Destination Marketing and Management Organization. Croes a enfatisa cu esaki no ta nifica cu ATA mester carga cu tur responsabilidad di e pais, pero cu tin area specifico cu ta directamente relaciona cu calidad di e destino turistico. “Nos playanan ta prioridad. Seguridad ta prioridad. Hospitalidad ta prioridad. Cultura tambe,” el a bisa.

LIMPIESA DI ARUBA Y ATA

Segun Croes, limpieza di Aruba tambe ta cai den e marco aki, pasobra condicion di e isla y percepcion di e bishitante ta forma parti di e producto turistico. El a menciona como ehempel proyectonan piloto y instalacion di bari di sushi. Croes a reconoce cu e tema ta uno politicamente sensitivo, pero a subraya cu ATA ta un organisacion a-politico y cu e decisionnan mester wordo tuma dentro di su marco legal y estrategia. “Nos ta respeta cu tin un trayecto politico cu nos no ta bay drenta (aden), pasobra nos ta a-politico,” Croes a declara. El a agrega cu ATA ta consciente cu tin necesidad pa splica mihor na comunidad unda su rol ta cuminsa y unda e ta termina. “Quizas loke nos mester subraya mas ta kico ATA ta y kico ATA no ta,” Croes a bisa. Cu su contesta, Croes a defende cu inversion den limpieza, beach, seguridad, hospitalidad y otro aspecto di e destino no mester wordo mira automaticamente como uso impropio di fondo, sino como parti di e funcion di ATA den maneho y calidad di producto turistico.