Cuida Aruba ta habri seis punto pa deposita desperdicio diasabra

ORANJESTAD – Gobierno di Aruba y su partnernan a anuncia seis localidad unda comunidad por deposita desperdicio durante e di dos edicion di Dia Nacional pa Cuida Aruba, diasabra 29 di augustus, di 7:00 AM pa 12:00 PM.

E puntonan ta na San Nicolas, Pos Chikito/Burubundo, Barcadera, Santa Cruz, Oranjestad y Tanki Leendert. Segun Prome Minister Mike Eman, e cantidad a wordo limita na seis pa haci e operacion mas eficiente, despues cu durante e prome edicion hopi punto simultaneamente a crea presion riba trucknan y retiro di bakinan yen.

Organisadornan ta pidi comunidad pa separa desperdicio desde cas pa facilita descarga, transporte y procesamento. Na Harbour Arena lo tin un sistema special di entrada y salida pa mantene trafico den bon fluho.

E Zona di Desperdicio na EcoTech Barcadera ta habri tur dia di 7:00 AM pa 3:00 PM, y Gobierno ta encurasha hende pa no warda te diasabra si nan por deposita nan desperdicio prome.

Cuida Aruba ta enfoca no solamente riba limpiesa, pero tambe riba salud publico. Desperdicio bandona por acumula awa y crea criadero pa sangura, aumentando riesgo di dengue. Comunidad, organisacion y compania tambe por participa como boluntario of adopta un sitio pa limpia.

E seis localidadnan ta: Veld di Trupial na San Nicolas, veld di baseball na Pos Chikito/Burubundo, EcoTech Barcadera, Veld di Arsenal na Santa Cruz, Harbour Arena na Oranjestad y veld banda di Colegio Ora Ubao na Tanki Leendert.