HOH ta hiba Gobierno corte pa AWG 29 miyon di cuido sin paga

ORANJESTAD — Horacio Oduber Hospital (HOH) ta prepara un kort geding contra Pais Aruba pa obliga Gobierno asumi su responsabilidad pa financia cuido medico duna na personanan indocumenta. Noticiacla a confirma cu e caso lo wordo entama mas laat den e siman aki. Segun director di HOH, Jacco Vroegop, actualmente tin mas cu AWG 29 miyon na facturanan habri pa cuido cu hospital a presta, pero pa cual no tin un sistema structural di pago.

Ta trata di personanan cu ta biba na Aruba, pero cu no ta cay bou di UO AZV y cu, den hopi caso, no tin posibilidad financiero pa paga nan propio tratamiento. Sin embargo, hospital no por nenga nan cuido medico urgente.

“Nos no por bisa un persona cu un hemorragia cerebral, infarto of herida serio pa bolbe ora su papel- of situacion financiero ta regla. Un muhe cu mester duna luz no por warda riba permiso. Y tampoco un persona cu ta na peliger di sangra te muri,” Vroegop a declara.

Segun director, esaki no ta solamente un responsabilidad medico, sino tambe un cuestion di humanidad. E vision di HOH ta pa ofrece cuido accesibel pa tur hende, sin compromete calidad.

GASTONAN TA CAY RIBA CUIDO PA PUEBLO DI ARUBA

Vroegop ta enfatisa, sinembargo, cu cuido medico no ta gratis. Pa añanan caba, HOH ta cubri e gastonan pa medio di financiamiento cruza, usando entre otro entrada genera cu cuido na turista y fondo cu hospital ta haya via AZV.

Esaki ta nifica cu cada florin usa pa cuido sin un fuente di financiamiento ta un florin cu no por wordo inverti den personal, equipo medico, capacidad of reduccion di e tempo cu paciente mester warda. “Na final nos ta kita placa for di cuido pa poblacion di Aruba, pa paga pa un responsabilidad pa cual Gobierno ainda no a regla financiamiento structural,” Vroegop a señala.

E problema a crece considerablemente. Segun e cifranan presenta pa director di HOH, na 2017 e suma anual tabata aproximadamente AWG 1,4 miyon. Aña pasa, e gastonan a subi te AWG 5,1 miyon, mientras cu te cu augustus di e aña aki nan a sobrepasa AWG 3 miyon.

E TOTAL ACUMULA DI FACTURANAN HABRI A PASA AWG 29 MIYON.

Vroegop ta bisa cu tanto e mes como su antecesornan a manda carta, advertencia y recordatorio repetidamente na Gobierno. Segun e, Gobierno ta consciente di e problema, pero no a implementa un solucion duradero. “Recordatorio ta termina; accion ta cuminsa”

E director a conecta e asunto tambe cu obligacionnan internacional relaciona cu acceso na cuido medico pa migrante, refugiado y solicitante di asilo, sin importa nan status di estadia.

Segun Vroegop, no ta coherente reconoce cu hende tin derecho riba cuido medico necesario, sin regla ken lo paga pa e cuido ey.

“Mi no ta e prome director di HOH cu ta presenta e problema aki. Pero mi ta esun cu awor ta bisa: nos no por sigui asina pa otro cantidad di aña,” el a declara.

Pa Vroegop, e situacion ta pone no solamente stabilidad financiero di hospital na peliger, sino tambe e bienestar di empleadonan y cuido pa paciente na Aruba.

Noticiacla a confirma cu HOH ta prepara un procedimiento urgente contra Pais Aruba y cu e caso ta programa pa wordo presenta mas laat e siman aki. Vroegop ta aclara cu hospital no ta busca conflicto y tampoco tin intencion di stop cu tratamento di personanan indocumenta. “Nos lo sigui duna cuido. Esaki ta nos responsabilidad. Pero Gobierno awor finalmente mester tuma esun di dje.”

Menasa di morto despues di entrevista

Vroegop a indica tambe cu, despues di un entrevista cu TeleAruba, el a ricibi tanto reaccion di sosten como critica. Segun dje, critica ta aceptabel, pero acusacionnan personal y hasta un menasa di morto a pasa tur limite.

El a rechasa e sugerencia cu e problema por wordo soluciona simplemente door di reemplasa e direccion di hospital of pone especificamente un Arubiano den su posicion.

“Un otro director no ta haci e AWG 29 miyon desaparece. E pacientnan tampoco no ta desaparece y responsabilidad di Gobierno no ta desaparece,” el a bisa.

Te na momento di publicacion, Gobierno di Aruba no tabatin un reaccion oficial riba e anuncio di e caso. Noticiacla ta tene espacio habri pa reaccion di Gobierno.