Wever: HOFA ta limita intervencion di Hulanda den finansa di Aruba

ORANJESTAD – Minister di Finansa Geoffrey Wever a declara den entrevista cu Tito Laclé di Noticiacla cu e sistema actual di supervision financiero di Reino ta mas amplio y mas invasivo cu loke ta proponi bou di ley di HOFA.

Segun Wever, bou di e sistema actual Hulanda tin influencia riba diferente aspecto di maneho financiero di Aruba, incluyendo gasto publico, costo di personal, presupuesto y reduccion di debe publico. “Bou di HOFA, e cantidad di condicionnan y posibilidadnan pa interveni ta mucho mas limita,” Wever a splica.

E minister a indica cu e sistema actual ta duna Reino mas espacio pa interveni si Aruba no cumpli cu obligacionnan financiero, mientras cu HOFA lo concentra riba un cantidad mas limita di norma specifico.

Segun Wever, e punto principal ta cu HOFA no ta amplia influencia di Hulanda, sino ta reduci e nivel di intervencion y ta duna Aruba mas espacio pa maneha su propio finansa publico.