Noticiacla ta lansa su encuesta nacional riba HOFA

ORANJESTAD – Noticiacla ta lansa un encuesta nacional pa midi opinion di pueblo di Aruba riba e ley di HOFA y e futuro di supervision y disciplina financiero di nos pais.

E encuesta ta enfoca riba preguntanan clave manera si e ciudadano ta pro of contra HOFA, si Aruba mester tin supervision financiero externo, cuanto confianza tin den Gobierno pa mantene disciplina financiero sin HOFA, y si pueblo ta considera e acuerdo principalmente como proteccion financiero of como un limitacion di autonomia.

Tambe e encuesta ta busca pa determina si e ciudadano ta kere cu Parlamento mester aproba HOFA, si pueblo mester haya oportunidad pa expresa su opinion den un referendum y si Gobierno y Parlamento a informa comunidad suficientemente riba e contenido y consecuencianan di e acuerdo.

Ademas, participantennan por indica nan preocupacion principal y explica den nan propio palabra pakico nan ta pro of contra HOFA. E encuesta inclui tambe algun pregunta demografico pa por analiza con opinion ta varia entre diferente grupo di edad, districto y otro segmento di comunidad.

Cu e encuesta aki, Noticiacla kier brinda pueblo un oportunidad directo pa expresa su opinion riba un asunto cu por tin consecuencia importante pa futuro financiero y autonomia di Aruba.

Click AKI pa participa den e encuesta di HOFA.