Oduber(MEP): Gobierno tin surplus, pero educacion ta keda sin suficiente recurso

ORANJESTAD – Parlamentario Dangui Oduber ta critica Gobierno y Minister Gerlien Croes pa loke e ta considera falta di prioridad pa educacion na inicio di e aña escolar nobo. Segun Oduber, mientras Gobierno ta conta cu un surplus di alrededor di 700 miyon florin, varios scol ainda ta enfrenta problema serio di infrastructura y falta di recurso.

Oduber a señala cu speelplaats, gymzaal y otro facilidadnan na varios scol ta den mal estado. El a critica tambe cu e promesa pa instala solar panel na scolnan, pa reduci gasto di energia y alivia e pago di aircogeld pa mayornan, ainda no a wordo cumpli.

Segun e parlamentario, fondo adicional mester wordo usa pa drecha scolnan, mehora condicion laboral y salario di maestro, y provee mas herment pa educacion. El a cuestiona dicon, cu un surplus asina grandi, maestronan ainda ta saca placa for di nan propio cartera pa prepara klas.

Oduber ta responsabilisa Minister Croes pa falta di progreso y a critica tambe e cantidad di biahe oficial cu e minister a realisa, cuestionando kico resultado concreto esakinan a trece pa educacion na Aruba.