Pieters(PPA): cinco luna despues Censo ainda sin cita; señal di benta ilegal di slot

ORANJESTAD – Lider di fraccion di PPA, Eduard Pieters, ta bolbe critica e problema di falta di cita na Censo pa personanan cu ya a haya permiso pa establece y traha na Aruba. Segun Pieters, cinco luna despues di su prome denuncia na maart, e problema ainda ta persisti y awor tin señal cu cita supuestamente ta wordo bendi ilegalmente pa entre Afl. 50 y Afl. 200.

Pieters ta pone responsabilidad politico directamente riba Minister Dowers y ta enfatisa cu no ta direccion ni trahadonan di Censo cu mester wordo culpa. Segun dje, si Gobierno aumenta e cantidad di permiso, e mester tambe prepara Censo cu suficiente personal, fondo y sistema pa procesa e demanda.

E parlamentario ta considera e supuesto benta di slot preocupante y ta pidi un investigacion urgente. Ainda no tin denuncia formal, pero segun dje e señalnan riba plataforma social ta suficientemente serio pa no ignora.

Pieters tambe ta enfatisa cu falta di inscripcion por tin consecuencia directo pa acceso na seguro social, financiamento y otro servicio esencial. El a menciona especialmente casonan di personanan cu por enfrenta preocupacion tocante cobertura medico.

Segun Pieters, Ombudsman tambe a hala atencion riba e problema. PPA a manda pregunta nobo na Gobierno y ta pidi pa Censo haya e recursonan necesario, incluyendo mehor sistema y posiblemente un conexion cu DIMAS.