Cicilia ta anuncia aerolineanan, pero gobierno ainda no a comproba ni un solo buelo

ORANJESTAD – Minister di Turismo y Transporte, Wendrick Cicilia, a crea expectativa cu por lo menos cuater aerolinea tin interes pa reanuda buelonan entre Venezuela y Aruba. Pero ora pone e anuncio bou di lupa, e informacion no ta cuadra: diferente version ta menciona diferente compania, Gobierno no a publica e lista oficial y te awor no tin ni un solicitud, permiso, itinerario of fecha di inicio confirma publicamente. Den otro palabra: tin nomber, pero no tin buelo.

NOMBER DI AEROLIÑANAN

Inicialmente, medionan Venezolano a menciona Aruba Airlines, Turpial Airlines y Laser Airlines. Despues di e prome charter for di Caracas, otro version atribui na Cicilia a menciona Aruba Airlines, Laser Airlines y Aeropostal. Otro publicacionnan a agrega Rutaca y a papia di “por lo menos cuater” aerolinea. Cua cuater nan, anto e pregunta ta. Si Gobierno realmente a ricibi interes di por lo menos cuater compania, mester ta facil pa Cicilia identifica nan y splica ki tipo di acercamento a tuma lugar. Pero te awor no tin un lista oficial, copia di carta di interes, solicitud entrega na Departamento di Aviacion Civil ni confirmacion directo di e aerolineanan.

Investigacion di NoticiaCla ta mustra cu no ta completamente correcto pa bisa cu e companianan menciona no ta existi si. Pero nan situacion actual ta mucho menos concreto cu e impresion cu anuncio di Cicilia a crea. Aruba Airlines ainda ta existi legalmente, pero su flota y operacion ta considerablemente mas limita cu den pasado. No tin itinerario publica ni ticket na benta pa Venezuela–Aruba. Turpial Airlines ta activo den Venezuela, pero tampoco a anuncia un ruta pa Aruba. Laser Airlines ta existi y ta opera buelonan domestico y internacional. Sinembargo, no tin anuncio oficial di e compania cu ta confirma un regreso pa Aruba. Aeropostal a pasa door di cierre, reinicio y cambio di propiedad. Awe e ta bou control estatal Venezolano y tin un operacion limita. E Aeropostal actual no ta necesariamente mesun structura empresarial cu e compania cu anteriormente tabata bula pa Aruba. Rutaca tambe ta aparece den algun version publico, pero no den tur. Tampoco tin un anuncio verificabel di un ruta pa Aruba. Cambio di propietario no ta nifica automaticamente cu un aerolinea no ta existi. Pero Cicilia no por simplemente usa nombernan historico of informacion di segunda mano pa crea e impresion cu cuatro compania ta para cla pa bula.

INTERES VS RUTA COMERCIAL

Tin un diferencia grandi entre “interes” y un ruta comercial. Un aerolinea serio mester presenta solicitud, demonstra cu tin certificado vigente y avion disponible, haya autorizacion di Aruba y Venezuela, establece frecuencia y habri venta di ticket. Ningun di e pasonan ey a wordo comproba publicamente pa e supuesto cuater aerolineanan. Por lo menos, no publicamente. 

E PROME CHARTER

Frontera aereo a habri formalmente dia 1 di augustus berdad,y un charter a yega for di Caracas. Pero un charter incidental no ta un servicio comercial regular. Pasahero ainda no por cumpra un ticket directo Venezuela–Aruba cu ninguno di e companianan menciona.

PREMATURO

P’esey, e anuncio di Cicilia ta prematuro y, den su forma actual, potencialmente engañoso. No necesariamente pasobra e aerolineanan no ta existi, sino pasobra Gobierno ta presenta un posibilidad como si fuera tin un desaroyo concreto, sin mustra e evidencia necesario. Minister Cicilia mester publica e nomber exacto di e cuater companianan, indica cua di nan a entrega un solicitud formal y bisa ki fecha e prome buelo regular por cuminsa. Tanten cu e no haci esey, e realidad ta simpel: Gobierno a anuncia por lo menos cuater aerolinea, pero ainda no a comproba ni un solo buelo.