Arends-Reyes (AVP): Renobacion di US$106 miyon ta duna Riu Palace Aruba un impulso nobo

ORANJESTAD – Parlamentario Jennifer Arends-Reyes, Presidente di Comision di Turismo di Parlamento, a bishita Riu Palace Aruba pa conoce e resultado di un renobacion cu a representa un inversion di aproximadamente US$106 miyon.

Durante un presentacion y tour di e propiedad, Arends-Reyes a observa e facilidadnan renoba y e cambionan haci pa eleva calidad di e producto, servicio y experiencia cu e hotel ta ofrece na bishitantenan.

Segun e parlamentario, inversionnan di e magnitud aki ta importante pa mantene Aruba competitivo como un destinacion turistico di nivel halto. Ademas di fortalece e oferta hotelero, nan ta genera actividad economico y ta contribui na desaroyo di industria di hospitalidad.

“Pa Aruba sigui competitivo, ta esencial cu nos producto turistico sigui evoluciona y renoba,” Arends-Reyes a declara.

Como Presidente di Comision di Turismo, Arends-Reyes a enfatisa cu contacto directo cu sector ta importante pa conoce tanto e oportunidadnan como e retonan cu industria ta enfrenta. E la agrega cu Gobierno, Parlamento y sector priva mester sigui traha hunto pa promove un turismo sostenibel y di calidad.