Mortonan na Venezuela a subi te 188 mientras 1.520 persona a keda herida

CARACAS – Autoridadnan di Venezuela a confirma cu e cifra oficial di victimanan despues di e dos fuerte temblornan a subi te 188 morto, mientras 1.520 persona a keda herida y mas cu 200 ainda ta bao di e ruinan den diferente partinan di pais. Presidente di Asamblea Nacional, Jorge Rodríguez, a informa cu 157 persona ainda ta desapareci y cu 2.927 famia a wordo afecta pa e desastre natural.

LA GUAIRA TA E AREA MAS AFECTA

E estado di La Guaira, specialmente e localidadnan di Caraballeda y Playa Grande, ta e region cu a sufri e mayor daño. Te awor, por lo menos 250 edificio a wordo destrui of a sufri daño severo. Tambe tabatin daño na 8 hospital, di cual algun a mester wordo evacua di emergencia pa trece pashentnan na otro centro medico. Ademas, 20 centro comercial y 46 proyecto di infraestructura publico a wordo afecta.

UN CAREDA CONTRA TEMPO

Operacionnan di busca y rescata ta sigui sin para, mientras rescatistanan ta haci tur esfuerzo pa localisa sobrevivientenan. “Nos ta den un careda contra tempo pa rescata nan bibo,” Jorge Rodríguez a declara. Gobierno tambe a habri un linea telefonico adicional, hunto cu e sistema VENApp, pa famianan por reporta personanan desapareci of cu no por haya contacto cu nan sernan keri.

AYUDO INTERNACIONAL TA AUMENTA

Mientras e emergencia ta sigui, diferente paisnan y organizacionnan internacional a ofrece ayudo humanitario. Prome Minister di Spaña, Pedro Sánchez, tambe a confirma cu su pais lo manda asistencia humanitario y lo brinda apoyo na Venezuela durante e crisis. Na mes momento, organizacionnan civil y empresarionan den Venezuela a cuminsa campaña pa colecta cuminda, remedi y otro articulonan di prome necesidad pa e miles di famianan cu a perde nan cas. Autoridadnan ta sigui monitorea e situacion y no ta exclui cu e cantidad di morto y herido por subi ainda mas, mientras ekiponan di emergencia ta sigui cu e operacionnan di busca y rescate den e edificionan cu a colapsa.