Hulanda ta declara prome Alerta Cora pa calor extremo; temperatura por subi te 40 grado

HULANDA – Hulanda ta prepara pa un di e dianan mas calor den su historia, despues cu Instituto Real Hulandes di Meteorologia (KNMI) a declara pa prome biaha un Alerta Cora pa calor extremo. Temperatura por yega te 40 grado Celsius diabierna den algun regionnan.

Gobierno hulandes y diferente organizacionnan a tuma medida preventivo pa proteha salud publico. Cruz Cora y Aliansa Hulandes pa Clima a haci un yamada urgente pa habri espacionan publico cu aire acondiciona pa personanan cu no por haya frescura den cas, specialmente personanan mayor, mucha chikito, muhe na estado y otro grupo vulnerable.

E calor extremo por afecta tambe trafico y transporte publico. Companianan di transporte a adverti cu por tin retraso, cancelacion di viaje y problema tecnico pa motibo di calor. Na Utrecht, tramnan no lo circula pa dos dia pasobra e calor a afecta e cambionan di via.

KNMI a adverti cu asfalt por smelt, camindanan y brugnan por cera temporalmente y trennan por haya retraso pasobra railnan ta expande cu e calor.

Hospitalnan ainda no ta raportando problema serio, pero nan ta spera un aumento di pacientenan cu deshidratacion, sobrecalentamento y golpi di calor. Algun hospital ya a tuma medida adicional, incluyendo consultanan telefonico na luga di bishita na policlinica y reparticion di helado pa pacientenan.

Na provincia di Zeeland tambe a sali un advertencia pa no landa na un playa na Scharendijke, despues cu analisis a mustra contaminacion den e awa, posiblemente causa pa excremento di hende of animal.

KNMI ta aconseha ciudadano pa bebe hopi awa, evita sali den solo si no ta necesario, no haci actividad fisico pesado, sigui e Plan Nacional pa Calor, cuida mascotanan y, si ta posible, no biaha durante e periodo di calor extremo.

E Alerta Cora lo drenta na vigor for di anochi pa 12:00 y lo keda valido te mainta siguiente pa 12:00, mientras autoridadnan ta sigui monitorea e situacion.