Dos amigo ta gana $12.5 miyon na Canada y ta haci chansa cu nan ta bay Aruba

CANADA – Un premio grandi di Lotto Max na Canada a pone Aruba inesperadamente den centro di e celebracion di dos amigo di Alberta, despues cu nan a gana un jackpot di $12.5 miyon Canadese.

Rodney McFadyen di Provost y Derek Marsh di Edmonton ta hunga loteria hunto pa varios aña y tur siman nan ta alterna pa cumpra nan ticket. Un ticket cumpra na Provost pa e sorteo di 19 di mei 2026 finalmente a cambia nan bida: cada uno lo ricibi $6.25 miyon.

Mientras cu ambos ta bisa cu nan kier tuma tempo prome cu dicidi kico haci cu e placa, Aruba ya a aparece den nan chansa tocante un posible celebracion.

“Nos a haci chansa tocante bay Aruba y laga nos casanan cu un stapel di Scratch & Win pa tene nan ocupa te ora nos bolbe cas,” Marsh a bisa.

McFadyen a descubri e premio ora el a scan e ticket y a mira e suma di $12.5 miyon aparece. Segun e, el a keda completamente paralisa di sorpresa. Marsh inicialmente no a kere su amigo, pasobra anteriormente McFadyen ya a haci chansa cu ne tocante gana loteria. Pero despues di verifica e numbernan, e tambe a realiza cu nan bida a cambia.

Pa awor, ambos ta pone e placa den banco mientras nan ta pensa cuidadosamente riba nan siguiente pasonan. Aparte di e chansa di un biahe pa Aruba, nan a indica cu nan esposanan y yiunan ta prioridad y cu nan tin intencion di comparti e bon fortuna cu nan famianan.