Famia di Kimberly ta busca testigonan di accidente fatal na Grapefield

SAN NICOLAS — Famia di Kimberly van Ardenne ta haci un yamada urgente na personanan cu a presencia of tin informacion tocante e accidente fatal cu un UTV, dia 13 di september 2026 na Grapefield, San Nicolas.

Kimberly, un hoben Hulandes di 23 aña, a perde su bida despues cu e UTV den cual e tabata a accidenta den e area. Informacion preliminar publica despues di e tragedia a indica cu e vehiculo a bolter y cu paramediconan no por a salb’e.

Riba un poster circula riba social media, famia ta expresa cu nan ta profundamente afecta pa su morto y cu ainda tin pregunta tocante loke exactamente a pasa. Nan ta señala cu diferente version ta circula, mientras cu aparentemente tabatin testigonan presente na e lugar.

Pa logra un imagen mas cla di e ultimo momentonan prome y durante e accidente, famia ta pidi tur persona cu a mira algo of cu dispone di informacion relevante pa tuma contacto.

Testigonan por manda un mensaje via WhatsApp na +31 6 40580456 of contacta famia via Facebook.

E peticion no ta solamente pa haya claridad riba e causa y circunstancianan di e accidente, sino tambe pa yuda un famia den luto haya contesta riba e tragedia cu a kita nan yiu muhe, nieta, ruman y prima.