AWSS ta alerta pa posibel molester di holor durante mantencion proximo

ORANJESTAD – Aruba Wastewater Sustainable Solutions (AWSS) lo inicia dialuna 17 di augustus un programa di mantencion preventivo di 10 dia na e planta di tratamento di awa preto na Bubali.

E trabounan lo concentra riba e sistema di aeracion cu difusor y, segun AWSS, ta necesario pa mantene confiabilidad, seguridad y eficiencia di e proceso di tratamento. Operacion normal di e planta lo sigui sin interrupcion durante e mantencion.

AWSS ta alerta comunidad cu durante e trabounan por presenta molester temporario di holor den e area rond di e planta na Bubali. E compania ta indica cu esaki por presenta como consecuencia normal di e tipo di mantencion aki.

Segun AWSS, e posible molester di holor no ta representa ningun riesgo pa salud y tur medida necesario ta wordo tuma pa minimalisa e inconveniencia pa comunidad y sector comercial.

E mantencion a wordo programa prome cu temporada halto di turismo pa asegura continuidad y calidad di e servicio di tratamento di awa preto. E trabounan ta programa pa caba dia 27 di augustus.