Inflacion na Aruba a subi te 2.1%; costo di bida a sigui subi de mei

ORANJESTAD – E costo di bida na Aruba a sigui subi durante luna di mei 2026. Cifranan publica door di Oficina Central di Estadistica (CBS) ta mustra cu e Indice di Prijs di Consumo (CPI) a subi cu 1.0% compara cu april, mientras cu e inflacion anual a alcanza 2.1%. Segun CBS, e CPI a subi di 110.78 na april pa 111.90 na mei. Di e 12 sectornan principal den e canasta di consumo, 9 a registra un aumento di prijs, cu principalmente a wordo impulsa door di e sectornan di transporte, paña y sapato, y comunicacion. E mayor impacto riba e indice a bini for di e sector di Transporte, cu a subi 3.3%, principalmente door di un aumento den e gastonan relaciona cu uso di vehiculonan personal. Tambe, Paña y sapato a registra un aumento notable di 12.9%, mientras cu Comunicacion a subi 2.7%, principalmente pa motibo di prijs mas halto di ekipo di telefonia. No tur prijs, sinembargo, a subi. CBS a indica cu e sector di Mobilario a baha 3.1%, principalmente door di prijs mas abou di aparato domestico, hermentnan y ekipo pa cas y hardin. Esaki parcialmente a compensa e aumentonan den otro sectornan.

BESTAANSMINIMUM TA SIGUI AUMENTA

E informe ta mustra tambe cu e bestaansminimum pa un hogar cu dos adulto y dos mucha a subi di Afl. 5,588 na april pa Afl. 5,641 na mei, un aumento di Afl. 53 den un luna. Pa un hogar di un solo adulto, e monto minimo pa cubri gastonan esencial a subi pa Afl. 2,686. Compara cu mei di aña pasa, e bestaansminimum pa un famia di cuater persona a aumenta cu Afl. 131, principalmente door di prijs mas halto di cuminda y transporte.

GASOLIN A SUBI, AWA Y LUZ A KEDA MESCOS

Durante mei, e prijs promedio di un bari di petroleo a subi cu 2.5%, loke a contribui na un aumento di 6.9% den prijs di gasolin y 4.3% den diesel. Prijs di electricidad y awa, sinembargo, no a cambia durante e luna.