Presion legal di Aruba Birdlife Conservation a resulta den cierre di rutanan na costa norte

ORANJESTAD – Despues di lunanan di discusion y presion legal, Gobierno di Aruba diaranson a cuminsa cera e aceso na varios ruta na costa norte di Aruba. E decision ta sigui un proceso huridico inicia door di Aruba Birdlife Conservation (ABC), cu a presenta un demanda den Corte argumentando cu trafico di UTV, ATV y otro vehiculonan motoriza, tabata causando daño serio na algun di e areanan natural mas fragil di Aruba.

E DEMANDA

Segun e demanda presenta na mei di e aña aki, ABC ta argumenta cu e areanan manera Duinen California, Salina Druif, Tera Cora, Tres Trapi y un parti grandi di costa noordoost, tabata merece un nivel di proteccion mas halto debi na nan importancia ecologico, presencia di area proteha internacionalmente, y funcion como habitat pa diferente especie di parha y otro animalnan manera shoco. E demanda tambe a señala cu diferente documento oficial di Gobierno mes a reconoce e daño cu ATV y UTV ta causa na naturaleza, incluyendo erosion, stof excesivo, destruccion di vegetacion y perturbacion di fauna local. Interesantemente, e caso nunca a yega efectivamente pa un audiencia completo den Corte. Segun abogado Geert Rep, cu a representa Aruba Birdlife Conservation, e caso originalmente tabata agenda pa 28 di mei, pero prome cu e fecha ey yega, partidonan a drenta den negociacion. “ Promé cu e audiencia programa pa 28 di mei, partidonan a cuminsa dialogo y negociacion, sin renuncia na ningun di nan derechonan legal,” Rep a splica. Ademas, e abogado a sigura Noticiacla cu e demanda den e caso sumario ya tabata entrega na Corte prome cu accidente envolviendo e turista cu a perde bida recientemente, despues di a accidenta cu un UTV.

BUSCANDO SOLUCIONAN PRACTICO 

Segun e abogado, durante e consultanan, representante di ABC, Aruba Conservation Foundation (ACF) y Gobierno a reuni pa busca solucionnan practico. ABC a presenta diferente propuesta cu tabata sigui loke originalmente a wordo pidi den e demanda. Aparentemente, e resultado di e consultanan ta cu Gobierno awor ta cuminsa implementa medida nan concreto.

MEDIDANAN TUMA TA SEGUN LEY VIGENTE DI ROPV

“ E medidanan cu ta wordo tuma ta den concordancia cu e ley vigente,  specificamente cu e ROPV ” Rep a indica. Segun e abogado, e base legal principal ta e Ruimtelijk Ontwikkelingsplan met Voorschriften (ROPV), cu a defini claramente cua actividad ta permiti den area cu destinacion di Naturaleza, Naturaleza y Paisahe, y Beach. E posicion di ABC ta cu vehiculonan motoriza  manera UTV y ATV no ta cay den e funcionnan permiti pa e areanan ey.

ACTIVIDADNAN DI RECREACCION 

Den e demanda, ABC a argumenta cu na diferente area natural, e ROPV ta permiti solamente actividadnan di recreacion cu impacto minimal, manera canamento, of otro actividadnan cu no ta afecta e medio ambiente significativamente. E organisacion a sostene cu convoynan di UTV y ATV cu ta genera stof, zonido duro  y daño na vegetacion no por wordo considera recreacion di  impacto minimal.

MOMENTO IMPORTANTE 

E desaroyo actual por marca un momento importante den e debate cu ta durando añanan riba uso comercial y recreativo di UTV y ATV den costa norte. Pa defensornan di naturaleza, e medida ta representa un paso significativo den proteccion di area natural fragil. Pa operadornan turistico y otro usuarionan di e rutanan, e decision por significa cu nan lo mester adapta nan actividadnan y ruta nan den futuro. Algo cu por lo menos dos compania operador di e aparatonan di ATV y UTV a bisa caba cu nan lo tin cu haci, pero tambe a menasa cu caso sumario contra ABC.  Esaki pasobra e ta corta den nan operacion. Tin por lo menos 20 compania cu ta haci e operacion ey y cu 600 trahado cu ta encarga cu e operacion di e apartonan ATV y UTV. 

KICO MAS AWOR

Interesante awor ta, pa observa te unda e medidanan lo yega y si Gobierno lo sigui implementa mas restriccionnan den otro area natural, specialmente considerando cu den su propio plan nacional di biodiversidad, Aruba a indica cu e actividad di UTV y ATV eventualmente mester wordo reduci gradualmente y limita na un cantidad restringi di ruta te 2030. Mientrastanto, e accion reciente ta mustra cu, aun sin un veredicto formal di Corte, un proceso huridico por tin impacto directo riba e politica publico y maneho di naturaleza na Aruba.