Partidonan hulandes PVV y CDA kier Caribe paga mas pa Wardacosta

DEN HAAG – Dos partido politico den Parlamento Hulandes, PVV y CDA, ta pidi pa Gobierno hulandes revisa e manera cu gastonan di Wardacosta Caribe wordo reparti entre Hulanda, Aruba, Corsou y Sint Maarten. Actualmente, Hulanda ta paga 69% di e gastonan operacional di Wardacosta, mientras cu Aruba ta contribui cu 16%, Corsou cu 11% y Sint Maarten cu 4%. Pa 2026, e presupuesto total ta alrededor di 68 miyon euro.

REPARTICION HUSTO

PVV y CDA ta cuestiona si e reparticion actual ainda ta husto y ta argumenta cu e paisnan caribeño mester contribui mas na proteccion di nan propio awanan territorial. Sinembargo, Ministro di Defensa David van Weel no ta mira motibo pa cambia e acuerdo actual. Segun e ministro, e reparticion di gastonan ta formalisa den acuerdonan administrativo cu ta valido te 2028. Pa e motibo ey, Gobierno Hulandes no tin intencion di modifica e sistema durante e periodo actual.

Van Weel si a indica cu e financiamiento lo wordo revisa durante preparacion di un nobo plan plurianual pa e periodo 2029 te 2038. Te e momento ey, e reparticion actual lo keda intacto.

E debate ta tuma luga den un momento cu Warda Costa ta confronta presion financiero creciente. Entre otro tarea, e organizacion ta participa den combate contra trafico internacional di placa y den cooperacion cu autoridadnan americano den Caribe.

Apesar di e desafio nan financiero, ministro Van Weel ta asegura cu Warda Costa ainda tin recurso suficiente pa continua ehecuta su tarea nan dentro di e presupuesto actual.   Portret cortesia : Tim van Dijk