Arnhem: “Ta presidente di SPA mes ta e persona cu no a atende invitacionan pa consulta!”

ORANJESTAD – Alto Comisario di Polis Ramon Arnhem diahuebs a reacciona riba declaracionnan di presidente di Sindicato di Polis Aruba (SPA), Lito Laclé, afirmando cu semper e la keda habri pa dialogo y consultacion cu e sindicato. “Mi no a ricibi ningun invitacion cu mi no a acepta. Mi semper ta dispuesto pa papia cu tur hende,” Arnhem a declara.

NO A ACEPTA INVITACION

Segun e comisario, ta precisamente presidente di SPA kende no a acepta algun invitacionnan pa reuni y discuti e preocupacionnan existente den cuerpo policial. “Presidente di SPA mes ta e persona cu no a atende invitacionnan pa consulta. Sinembargo, mi ta sigui invita tanto dje como e directiva di sindicato pa sinta hunto y busca solucionnan.”

SPERANSA PA DIALOGO

Arnhem a expresa speranza cu eventualmente e dialogo lo tuma lugar. “Mi spera cu un dia e lo acepta e invitacion. Mi ta dispuesto pa busca solucionnan hunto cu ne y cu directiva di sindicato.” Comisario a reconoce cu e sindicato awor ta pidi accion inmediato, pero a enfatisa cu pa logra solucionnan efectivo, ta necesario compronde completamente e problema promé.

“E presidente ta indica cu e no kier sigui papia, pero cu e kier mira accion y solucion inmediato. Mi tin dificultad cu e posicion ey, pasobra prome cu bo por busca un solucion, bo mester compronde exactamente cual ta e problema” e comisario a finalisa bisando.