Banco Central Europeo ta subi interes pa prome biaha den casi tres aña pa combati inflacion

BRUSELAS – Banco Central Europeo (ECB) a anuncia un aumento di interes den zona euro te na 2,25%, e prome subida den casi tres aña. E aumento ta relativamente chikito, di solamente 0,25 punto porcentual, pero e obhetivo principal ta pa controla e inflacion cu ta sigui subi den Europa.

Segun ECB, e aumento di prijsnan ta principalmente resultado di e subida fuerte den prijs di gas y petroleo. Esaki ta relaciona cu e conflicto den Medio Oriente y e cierre prolonga di e Estrecho di Hormuz, un ruta maritimo importante pa transporte di petroleo mundial.

Inflacion den zona euro a subi for di 1,9% na maart y april te 3,2% na mei. ECB ta aspira pa mantene inflacion cerca di 2%, pero awor ta proyecta cu inflacion promedio durante 2026 lo yega aproximadamente 3%.

Door di subi interes, ta bira mas caro pa empresarionan y consumidornan presta placa. E medida aki por reduci actividad economico y yuda controla e subida di prijsnan.

Presidente di ECB, Christine Lagarde, a indica cu situacion actual ta diferente di e periodo entre 2022 y 2023, ora guera den Ucrania a provoca varios aumento di interes. Segun expertonan economico, economia europeo actualmente ta mas debil, motivo pa cual ECB ta actua cu mas cautela.

Economistanan ta adverti cu ainda tin hopi incertidumbre. E impacto final lo depende di cuanto tempo e crisis energetico ta dura y con fuerte e prijsnan di energia lo sigui subi.

Inflacion no ta limita na Europa so. Den Merca, inflacion tambe a subi te 4,2% durante mei, principalmente door di e aumento den prijs di energia.

E decision di ECB por eventualmente resulta den un interes di spaar mas halto pa consumidornan, pero tambe por encarece prestamonan pa empresarionan y particularnan.