Infantino ta elogia Mundial 2026, pero evita preguntanan dificil

MEXICO CITY – Presidente di FIFA, Gianni Infantino, a declara cu Copa Mundial FIFA 2026 posiblemente lo bira “e evento mas grandi den historia di humanidad”, durante un conferencia di prensa na Estadio Azteca na Ciudad di Mexico, unda e torneo lo cuminsa cu e partido inaugural entre Mexico y Sur Africa. Infantino a destaca cu e Mundial cu lo wordo organiza den Merca, Canada y Mexico lo ta e edicion mas grandi, inclusivo y espectacular cu FIFA a organisa te cu awor. Durante su presentacion, e dirigente di FIFA a bolbe referi na declaracionnan controversial cu e la haci poco promé cu Mundial 2022 na Qatar. Segun Infantino, den e momento ey e tabata intenta pa representa e “bos di mayoria di mundo” cu, segun  e, hopi biaha no ta wordo tendi, especialmente den paisnan for di Europa y Norteamerica.

CONTROVERSIA DI MUNDIAL 

Mientrastanto, diferente controversianan ta sigui rondona Mundial 2026. Un di nan ta e caso di arbitro somali Omar Artan, cu a wordo nenga entrada na Merca pa motibonan relaciona cu sospechanan di seguridad. Infantino a reconoce cu e situacion tabata desafortuna , pero a declara cu FIFA no por controla tur decisionnan migratorio di gobiernonan.

ORGUYO CU IRAN

Presidente di FIFA tambe a expresa orguyo cu seleccion di Iran finalmente a logra participa den e torneo, apesar di tensionnan politico entre Iran, Merca y Israel. Sinembargo, e  no a comenta riba e dificultadnan cu delegacion iraniano a confronta tocante visa y movilidad durante e campeonato.

EVITA PREGUNTA RIBA PRIJS HALTO DI CARCHI

Durante e conferencia di prensa, Infantino tambe a evita entra profundamente den preguntanan tocante e prijs halto di entrada pa partidonan, problematica di visa pa participante y aficionadonan, y e influencia politico di presidente americano Donald Trump riba e torneo. Criticonan ta señala cu, apesar di e mensahe di inclusion cu FIFA ta promove, diferente decisionnan relaciona cu acceso, visa y libertad di expresion ta sigui genera preocupacion entre observadornan internacional. Mundial FIFA 2026 lo conta cu e cantidad mas grandi di seleccionnan y partidonan den historia di e torneo, y FIFA ta spera cu e evento lo atrae millones di bishitante y aficionadonan for di tur rincon di mundo.