Brete: Un FIU fuerte ta esencial pa proteha economia y reputacion di Aruba

ORANJESTAD – Na ocasion di e prome celebracion mundial di Dia Internacional di e Unidadnan di Inteligencia Financiero (FIU), Director di FIU-Aruba, Angelo Brete, a destaca e importancia di e institucion den proteccion di Aruba contra crimen financiero, labamento di placa y financiamiento di terrorismo.

GUARDIAN SILENCIOSO

Brete a describi FIU-Aruba como un “guardian silencioso” cu ta traha tur dia patras di cortina pa proteha integridad di sistema financiero di Aruba. “Poco hende ta mira nos trabou directamente, pero tur dia tin profesionnan dedica cu ta analiza informacion financiero pa detecta posible actividad criminal y proteha nos comunidad,” Brete a expresa.

KICO FIU-ARUBA TA NIFICA?

E director a splica cu FIU-Aruba no ta un cuerpo policial ni un organismo di investigacion criminal. En cambio, su tarea principal ta ricibi, analiza y interpreta transaccionnan financiero inusual reporta door di banco, casino, notario, agente inmobiliario, accountant y otro entidadnan cu tin obligacion legal di reporta actividad sospechoso.

BALOR DI FIU

“E balor di un FIU no mester wordo midi solamente den cantidad di reportenan cu nos ta ricibi, sino den nos capacidad pa converti informacion den inteligencia util cu por yuda autoridadnan competente tuma decisionnan importante,” Brete a señala.

Segun Brete, den un mundo unda criminalnan ta usa mecanismonan cada biaha mas sofistica pa move placa ilegal, e rol di inteligencia financiero ta mas importante cu nunca. Door di analiza patronnan y conecta informacion, FIU por identifica posible indicacionnan di fraude, corupcion, traficacion di droga, traficacion di hende y financiamiento di terrorismo.

COMIENSO DI FIU

FIU-Aruba a wordo establece na 1 di maart 1996 como Meldpunt Ongebruikelijke Transacties (MOT) y durante casi tres decada a evoluciona pa bira un nodo importante den e red internacional di inteligencia financiero. “Un pais cu tin un FIU independiente, profesional y efectivo ta un pais cu ta miho prepara pa proteha su economia, su reputacion internacional y finalmente e bienestar di su comunidad,” Brete a afirma. E director tambe a enfatisa cu combate contra crimen financiero no ta responsabilidad di un solo institucion. “E lucha contra crimen financiero ta un responsabilidad comparti entre gobierno, sector financiero, sector no-financiero y comunidad. Solamente hunto nos por mantene nos sistema financiero fuerte y confiabel,” e la declara.

RECONOCEMENTO

Brete a conclui cu e celebracion di e prome Dia Internacional di e Unidadnan di Inteligencia Financiero ta un momento importante pa reconoce e trabou silencioso pero indispensable cu FIU-Aruba y su coleganan rond mundo ta desempeña diariamente pa salvaguarda  stabilidad y confianza den sistema financiero.