KLM Aruba Marathon a registra record historico cu 3.000 participante for di 42 pais

ORANJESTAD – KLM Aruba Marathon 2026 a registra un exito historico cu un record di 3.000 participante registra y corredor for di 42 pais diferente diadomingo, consolidando Aruba como un di e destinacionnan principal pa deporte y turismo deportivo den Caribe.

Mas cu 2.000 bishitante internacional, incluyendo corredor, famia y simpatisante, a bishita Aruba durante e fin di siman di e evento.

Un di e momentonan culminante tabata e establecimiento di un record nobo pa e recorrido di maraton. Corredor Colombiano Yhon Rodolfo Escamilla Quitian a gana e maraton di 42.2 kilometro den un tempo impresionante di 2 ora, 35 minuut y 25 segundo, convirtiendose den e corredor mas rapido cu nunca a completa e recorrido di Aruba. E la ricibi un premio di US$2.500.

Den categoria femenino, Emily Nelson di Merca a conkista e titulo cu un tempo di 3 ora, 42 minuut y 2 segundo.

Atletanan Arubano Jord Broers y Sandra Versteeg a destaca como e corredor masculino y femenino mas rapido di Aruba. Ambos a ricibi un ticket ida y bolbe cu KLM pa Amsterdam y participacion garantisa den Amsterdam Marathon.

E evento ta continua creciendo internacionalmente y ta mantene reconocimiento como un carrera certifica pa AIMS, clasificacion pa Boston Marathon y evento oficial di Abbott World Marathon Majors Age Group World Series.

Participantenan por a participa den distancia di 5KM, 10KM, Media Maraton (21.1KM) y Maraton completo (42.2KM). Tur e carrera nan a cuminsa y termina na Hilton Aruba Caribbean Resort & Casino, ofreciendo un recorrido espectacular banda di costa di Aruba.

Organisadornan a gradici e centenares di boluntario, personal medico, sponsor y organisacionnan cu a contribui na e exito di e evento. Entre e principal partnernan tabata KLM Royal Dutch Airlines y Aruba Tourism Authority (A.T.A.).

Despues di e exito record di e aña aki, organisadornan a confirma cu e noveno edicion di KLM Aruba Marathon lo tuma luga dia 5 y 6 di juni 2027.