Hulanda ta exigi numberplaat pa e-step, y Aruba ta mantene prohibicion

ORANJESTAD / DEN HAAG – Hulanda a introduci un sistema nobo unda cierto tipo di e-step y otro "bijzondere bromfietsen" lo mester tin un number di vehiculo pa por circula legalmente riba caminda publico. E medida ta aplica tambe pa vehiculonan manera Segway y BSO-busnan, como parti di un esfuerzo pa aumenta siguridad den trafico.

Segun e regla nobo, tur e-step nobo cu ta aproba lo mester haya un number di vehiculo inmediatamente, cu un costo di 18 euro. Propietarionan di vehiculonan cu ta existe caba lo haya un aña pa registra nan. Sinembargo, mayoria absoluto di e-stepnan cu actualmente ta den circulacion no ta cualifica pa e sistema, pasobra nan no a haya aprobacion oficial pa uso riba caminda publico. Esaki ta nifica cu nan no por haya un number di vehiculo y nan uso riba caminda publico ta sigui siendo ilegal.

Na e momento aki, solamente cuater model di e-step a haya aprobacion oficial den Hulanda. Tur cuater ta mas grandi cu e e stepnan chikito cu ta comun den hopi otro ciudadnan europeo. E modelo aproba mester cumpli cu rekisito tecnico hopi estricto, mientras cu den otro paisnan europeo e regulacionnan ta mas flexible. Gobierno hulandes, sinembargo, ta spera cu den futuro mas fabricante lo lansa modelo cu ta cumpli cu e normanan oficial.

MIENTRASTANTO NA ARUBA

E desaroyo aki ta interesante pa Aruba, pasobra nos isla tambe ta tratando cu e asunto di e-stepnan. Gobierno di Aruba a prohibi uso di e-stepnan riba caminda publico, argumentando cu e vehiculonan ta crea riesgo serio pa siguridad di trafico y cu hopi di nan no ta cumpli cu e requisito legal y tecnico pa circula. Ademas, recientemente corte a confirma cu gobierno tin autoridad pa actua contra uso ilegal di e-stepnan y e-bikenan, mientras cu Ministerio di Husticia a enfatisa cu e prohibicion ta sigui un tendencia internacional den paisnan manera Hulanda, Belgica, Francia, Spaña y Alemania.

Mientras Hulanda a scoge pa regula y permiti solamente e-stepnan cu ta aproba oficialmente mediante un number di vehiculo, Aruba ainda ta mantene un posicion mas estricto. Na Aruba, e-stepnan cu no ta conforma cu ley no por circula riba caminda publico, y autoridadnan a indica cu lo sigui enforsa e prohibicion pa proteha siguridad di tur usuario di trafico.